გურამ აბაშიძე

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სატრანსპორტო ფაკულტეტი საავტომობილო გზების მშენებლობის სპეციალობით 1962 წელს.

მუშაობა დაიწყო მშენებელ-ოსტატად გარდაბნის საგზაო უბანზე; 1973 წელს უფროს სამუშაოთა მწარმოებლად; 1974 წელს დაინიშნა ნაძალადევის (ყოფილი ლენინის) რაიონის სამშენებლო-სარემონტო სამმართველოს უბნის უფროსად; 1975 წელს თბილისის საქალაქო საბჭოს აღმასკომის სამშენებლო ტრესტ "ინჟმშენის" N1 საგზაო-სამშენებლო სამმართველოს უფროსად; 1978 წლიდან საქართველოს სასოფლო მშენებლობის სამინისტროს ტრესტის მმართველია; 1980 წლიდან კომუნალური მეურნეობის სამინისტროს სამშენებლო-სარემონტო რესპუბლიკური გაერთიანების უფროსი; 1982 წელს დაამთავრა საქართველოს მინისტრთა საბჭოსთან არსებული სახალხო მეურნეობის მართვის ინსტიტუტი; მისი უშუალო მონაწილეობით და ხელმძღვანელობით ექსპლუატაციაში შევიდა არაერთი საგზაო და სამშენებლო ობიექტი, მათ შორისაა: რკინიგზის გზაგამტარი ხიდი ნაძალადევის რაიონში, გარდაბნის ცენტრალური ტრასის 10 კმ-იანი მონაკვეთი, კომუნალური მეურნეობის სხვადასხვა შენობა-ნაგებობა და სხვა; არის ღვაწლმოსილი სპორტსმენი, გამოჩენილი კალათბურთელი; დაჯილდოებულია სახელმწიფო ორდენითა და სპორტული საზოგადოებების მედლებით.

წყარო: საქართველოს არქიტექტორთა და მშენებელთა ენციკლოპედია. -თბ., 2017.- გვ.28

• თბილისის "დინამო", წევრი (1952-1963)
• საბჭოთა კავშირის ნაკრები, წევრი (1955-1959)

• 1949 - მსოფლიოს ჩემპიონატი, ჩემპიონი სტუდენტთა შორის
• ევროპის ჩემპიონთა თასი, ფინალისტი
• სსრ კავშირის ჩემპიონატი, თასის მფლობელი
• სსრ კავშირის ჩემპიონატი, ჩემპიონი