ბესარიონ ბარათაშვილი (აღმოსავლეთ საქართველოს კათოლიკოს-პატრიარქი)

1680-1723წწ. იყო გარეჯის იოანე ნათლისმცემლის მონასტრის მღვდელი, გარეჯის ლიტერატურული ცენტრის ერთ-ერთი აქტიური მოღვაწე; მას მიეწერება ქართული "ჰაგიოგრაფიული კრებულის" II რედაქცია: დომენტი კათოლიკოსის ინიციატივით შედგენილი ადრინდელი კრებული მან შეავსო ახალი თხზულებებით(რაჟდენ პირველმოწამის, ლუარსაბ მეფის, ბიძინა ჩოლოყაშვილის, შალვა და ელიზბარ ერისთავების ცხოვრებანი); მას წვლილი მიუძღვის ქართული ლიტურგიკული და პოლემიკური მწერლობის განვითარებაშიც; სლავურ-რუსული პროლოგ-სვინაქსარების მიხედვით შეადგინა "სადღესასწაულოს" ახალი რედაქცია; ასევე, მრავალი საგალობელი, მათ შორის: სამი ჰიმნოგრაფიული კანონი: "კანონი-საგალობელი მღვდელ-მთავრისა იესე წილკნელისა", "კანონი-საგალობელი საუფლოისა კუართისა" - ნაწილი I, "კანონი-საგალობელი პირველმოწამისა რაჟდენისა"; საქართველოში მართლმადიდებლური რწმენის დასაცავად კათოლიკობისა და კათოლიკური ეკლესიის წინააღმდეგ დაწერა პოლემიკურ-დოგმატიკური თხზულება "გრდემლი"; 1723 და 1725-1737წწ. იყო აღმოსავლეთ საქართველოს კათოლიკოს-პატრიარქი, სასულიერო მწერალი, ჰიმნოგრაფი, ჰაგიოგრაფი, პოლემისტი, ლიტურგისტი.

წყარო: ქართული მუსიკის ენციკლოპედიური ლექსიკონი /ავტორ-შემდგენლები და რედაქტორები : რ. ქუთათელაძე, მ. ჯაფარიძე . – თბ., 2015. – გვ. 63