ქრისტეფორე ანდღულაძე

დაბადების ადგილი: ოზურგეთის რაიონი.

დაამთავრა საქართველოს ინდუსტრიული ინსტიტუტის სამშენებლო ფაკულტეტი 1928 წელს.

პროფესიული საქმიანობა დაიწყო "რიონჰესის" მშენებლობაზე. მუშაობდა სამშენებლო ტრესტ "ჰიდროენერგომშენში" დამპროექტებლად, ჰესის მშენებლობის უფროსის მოადგილედ, საწარმოო-ტექნიკური განყოფილების უფროსად; 1939 წელს დაინიშნა სამშენებლო ტრესტ "ჰიდროენერგომშენის" მცირე და საშუალო ჰესების საპროექტო განყოფილების უფროსად. მუშაობდა "ჩითახევჰესისა" და "ტყიბულჰესის" მთავარ ინჟინრად, ხელმძღვანელობდა "ორთაჭალჰესის" მშენებლობას; 1955 წლიდან იყო საპროექტო ინსტიტუტ "თბილჰიდროპროექტის" მთავარი ინჟინერი; 1959 წელს მიიწვიეს საქართველოს სახელმწიფო პოლიტექნიკურ ინსტიტუტში სამშენებლო ფაკულტეტის დეკანად; იყო საქართველოს პოლიტექნიკური ინსტიტუტის პრორექტორი სასწავლო დარგში და წარმოების ტექნოლოგიისა და საშენი მასალების კათედრის გამგე. წლების განმავლობაში აკონტროლებდა "ენგურჰესის" მიწისქვეშა სადერივაციო გვირაბების ბეტონის ხარისხს, უახლესი მეთოდით, ულტრაბგერითი აპარატურის გამოყენებით; ტექნიკის მეცნიერებათა კანდიდატი, დოცენტი, არაერთი საერთაშორისო კონგრესის (ინგლისში, საფრანგეთში) მონაწილე, მრავალი ნაშრომის, სახელმძღვანელოსა და გამოგონების ავტორი.

წყარო: საქართველოს არქიტექტორთა და მშენებელთა ენციკლოპედია. -თბ., 2017. გვ.50-51; საქართველოს ენერგეტიკოსები=Georgian Power Engineers: ენციკლოპედია.- თბილისი,. 2010.- გვ. 15-16

• საქართველოს დამსახურებული ინჟინერი

• ბეტონისა და რკინაბეტონის სამუშაოთა ტექნოლოგია : სახელმძღვ. უმაღლ. ტექნიკური სასწავლებლების სამშენებლო და ჰიდროტექნიკური ფაკ-ტების სტუდენტებისათვის (თანაავტორი). - თბილისი, განათლება, 1972. - 156გვ.