ვიოლეტა პაქსაშვილი

დაბადების ადგილი: ქ. თბილისი.

დაამთავრა თბილისის უცხო ენათა ინსტიტუტის ფრანგული ენის განყოფილება 1957 წელს; შ. რუსთაველის სახელობის თბილისის თეატრალური ინსტიტუტის სამსახიობო ფაკულტეტი 1962 წელს.

სწავლის პარალელურად იყო მარჯანიშვილის სახელობის თეატრის შტატგარეშე მსახიობი; სხვადასხვა წლებში მუშობდა მახარაძის (1964-1966), თელავის (1966-1968), სოხუმის ქართული დასის (1968-1971), რუსთავის (1973-1979), თბილისის სახელმწიფო დრამატულ (1979-1986) თეატრებში, შემდეგ, რუსთაველის თეატრის მსახიობად. მის მიერ შესრულებული როლებიდან აღსანიშნავია: მარგარიტა გოტიე (ა. დიუმას "ქალი კამელიებით"), ბაფთიანი გოგონა (ა. პერიალისის "ბაფთიანი გოგონა"), ადელა (ფ. გარსია ლორკას "ბერნარდა ალბას სახლი"), მარია ტიუდორი (ვ. ჰიუგოს "მარია ტიუდორი"), ესთერი (ი. ოტჩენაშეკის "რომეო და ჯულიეტა წყვდიადში"), მარიამი (ა. ჩხაიძის "ხიდი"), მაია (ნ. პოგოდინის "პეტრარკას სონეტი"), ბეტი (ჯ. პრისტლის "სახიფათო მოსახვევი"), დონა ბეტინა (ედუარდო დე ფილიპოს "ცილინდრი"), ანა ბატონიშვილი (ლ. გოთუას "მეფე ერეკლე"), აღაზა (ვაჟა-ფშაველას "მთანი მაღალნი"), ლიდია ვასილიევნა (ა. არბუზოვის "ძველმოდური კომედია") და სხვა.  1983 წელს ვ. პაქსაშვილი კომისრის (ვს. ვიშნევსკის "ოპტიმისტური ტრაგედია") სახის შექმნისთვის სსრკ-ის 60 წლისთავისთვის მიძღვნილი დრამატურგიის საკავშირო დათვალიერებაზე დაჯილდოვდა პირველი ხარისხის დიპლომით.

წყარო: საიუბილეო თარიღები: თეატრი, მუსიკა, კინო.- თბ., 1988. -გვ.47; საიუბილეო თარიღები : თეატრი, მუსიკა, კინო.- თბ., 2008.- გვ.59; ვიოლეტა პაქსაშვილი : თბილისის სახელმწიფო დრამატული თეატრის მსახიობ ვიოლეტა პაქსაშვილის შემოქმედება / მარგარიტა გოგლაშვილი // საქართველოს ქალი . -თბილისი,1986. - N1. - გვ.16-18

• 1983 - საქართველოს დამსახურებული არტისტი