ლიუდმილა გურგენიძე

დაბადების ადგილი: სოფელი ბუკისციხე, ჩოხატაურის რაიონი.

ჩოხატაურის საშუალო სკოლის დამთავრების შემდეგ მასწავლებლად მუშაობდა სოფ. ძირულას საშუალო სკოლაში, 1931-1935 წლებში კი მასწავლებლობდა თბილისის პირველ საშუალო სკოლაში, პარალელურად სწავლობდა თბილისის სასცენო ხელოვნების ორწლიან სასწავლო კურსებზე. სხვადასხვა წლებში მოღვაწეობდა ბაქოს ქართულ (1935-1937), ხაშურის (1937-1942), გორის (1942-1949) თეატრებში. 1949 წლიდან ბათუმის თეატრის მსახიობია. მის მიერ შესრულებული როლებიდან აღსანიშნავია: გვირისტინე (პ. კაკაბაძის "კოლმეურნის ქორწინება"), ვარდო (დ. ჭონქაძის "სურამის ციხე"), სონა (ა. ცაგარელის "ხანუმა"), დესპინე, კნეინა, სიდუ(შ. დადიანის "ნაპერწკლიდან", "გუშინდელნი", "გეგეჭკორი"), მარინე (ვ. გუნიას "და-ძმა"), ზეინაბი (ა. სუმბათაშვილის "ღალატი"), ანა დიმიტრიევნა (ლ. ტოლსტოის "ცოცხალი ლეში"), რაშელი (მ. გორკის "ვასა ჟელეზნოვა"), თელი (უ. ჰაჯიბეკოვის "არშინ მალ-ალან"), იოკასტა (სოფოკლეს "ოიდიპოს მეფე"), ნათელა (გ. მდივნის "სამშობლო") და სხვ.

წყარო: საიუბილეო თარიღები: თეატრი, მუსიკა, კინო.- თბ., 1989. -გვ.27

• 1957 - საქართველოს დამსახურებული არტისტი
• 1955 - აჭარის დამსახურებული არტისტი