კუკური აბაშიძე

დაბადების ადგილი: ქ. ჭიათურა.

დაამთავრა ქ. ბათუმის საშუალო სკოლა, ქ. თბილისის ხალხური შემოქმედების სახლთან არსებული საგუნდო-სადირიჟორო კურსები.

მოწაფეობის დროიდან მღეროდა აჭარის სახელმწიფო კაპელაში(ხელმძღვანელი მელიტონ კუხიანიძე); თავისი ხელმძღვანელისგან ისწავლა დირიჟორობა, სანოტო სისტემა, თეორია, სოლფეჯიო; 21 წლის ასაკში იყო ქ. ბათუმის კავშირგაბმულობის სიმღერისა და ცეკვის ანსამბლის ხელმძღვანელი; 1937 წელს ანსამბლმა მონაწილეობა მიიღო კავშირგაბმულობის რესპუბლიკურ დათვალიერებაში, სადაც I ხარისხის დიპლომი მიიღო; 5 წელი იმუშავა ანსამბლში, პრესაში ბევრჯერ აღინიშნა ანსამბლის მიღწევები, ხალხური სიმღერების სწორი და გემოვნებით შესრულება; გრიგოლ კოკელაძემ ის მომღერლად მიიწვია საქართველოს სიმღერისა და ცეკვის სახელმწიფო ანსამბლში, სადაც 1942 წელს დირიჟორობდნენ დავით კავსაძე და კირილე პაჭკორია; აქ სამი წელი იმუშავა, შემდეგ ვანის რაიონში გაგზავნეს სამუშაოდ, აქვე სასკოლო გუნდებსაც უძღვებოდა; ქ. ბოლნისში მიიწვიეს, სადაც ხელმძღვანელობდა სარაიონო გუნდს და ასევე საკოლმეურნეო ანსამბლიც შექმნა; ორივე ანსამბლით გამოდიოდა კონცერტებზე, წარმატებით გამოვიდნენ სომხეთში - კიროვაკანსა და სტეფანავანში; ბოლნისშივე უძღვებოდა მასწავლებელთა და სამეურნეო ტექნიკუმის მოსწავლეთა გუნდებს; ბოლნისის რაიონულმა ანსამბლმა მეექვსე, მეშვიდე და მერვე რესპუბლიკურ ოლიმპიადებში ქების სიგელები დაიმსახურა; მან დმანისის რაიონშიც იმუშავა; განთიადის, გომარეთისა და ჯავახის კოლმეურნეთა გაერთიანებული სარაიონო ანსამბლი ჩამოაყალიბა; 1958 წელს მიიწვიეს ქ. რუსთავში მეტალურგთა ანსამბლის ხელმძღვანელად; მომდევნო წელს მიიწვიეს ქ. ლაგოდეხში; ლაგოდეხის რაიონულმა ანსამბლმა ბოლო მეცხრე რესპუბლიკურ ოლიმპიადაზე პირველი ადგილი მოიპოვა და მიწვეულ იქნა საბჭოთა საქართველოს ორმოც წლისთავთან დაკავშირებულ ზეიმზე; კუკური აბაშიძის ოსტატობამ ლაგოდეხელთა ხალხური თვითმოქმედება მაღალ ახალ საფეხურზე აიყვანა, რაიონს სახელი გაუთქვა.

წყარო: ხალხური სიმღერის მოამაგენი.-თბ., 2007.-გვ. 37

• 1968 - საქართველოს კულტურის დამსახურებული მუშაკი