ანტონ ასათიანი

დაბადების ადგილი: ქ. ქუთაისი.

დაამთავრა საქართველოს ინდუსტრიული ინსტიტუტის სამშენებლო ფაკულტეტი, ინჟინერ-მშენებლის კვალიფიკაციით 1938 წელს.

უმაღლესი სასწავლებლის დამთავრების შემდეგ მუშაობა დაიწყო ზესტაფონის ფეროშენადნობთა ქარხნის, შემდგომ ტყიბულის გამამდიდრებელი ფაბრიკის მშენებლობაზე; 1939 წელს, როგორც ახალგაზრდა სპეციალისტი, მობილიზებით გააგზავნეს ქ. მოსკოვში სპეცდანიშნულების ობიექტების მშენებლობებზე, ასევე, მუშაობდა ქ. მოსკოვის მეტროპოლიტენის სადგურ "მაიაკოვსკის" მშენებლობაზე, სადაც სამუშაოთა მწარმოებლიდან უბნის მთავარი ინჟინერი გახდა; მეორე მსოფლიო ომის დამთავრებისთანავე გადმოიყვანეს საქართველოში მშენებლობის სამინისტროს სისტემაში და მას შემდეგ არაერთ სამშენებლო სამმართველოს ხელმძღვანელობდა. მათ შორის: ტყიბულში, ახალციხეში, წყალტუბოში, ბორჯომში და ბოლოს თბილისში, სამშენებლო გაერთიანება "მთავართბილმშენის" N2 სამშენებლო სამმართველოს უფროსი იყო; მისი უშუალო ხელმძღვანელობით აშენდა სასტუმრო "ბორჯომი", საშუალო სკოლები აბასთუმანში, ახალციხეში, სასტუმრო კომპლექსი "მზიური ველი" ბაკურიანში, დედათა და ბავშვთა 250-ადგილიანი სანატორიუმი სურამში, ბორჯომპარკში რკინიგზის სადგურის შენობა, ბორჯომის მინერალური წყლის ჩამომსხმელი ქარხნის მთავარი კორპუსი, საცხოვრებელი სახლების კომპლექსი ბორჯომში, პროფკავშირების 500-ადგილიანი სანატორიუმი ლიკანში, ხიდები ბორჯომსა და თბილისში მდ. მტკვარზე და სხვა; 1957 წელს არჩეულ იქნა წყალტუბოს საქალაქო საბჭოს დეპუტატად და აღმასკომის წევრად.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.58-59

• 1966 - საქართველოს დამსახურებული ინჟინერი