ვლადიმერ ალანია

დაბადების ადგილი: ქ. ხობი.

ქ. ხობის საშუალო სკოლის დამთავრების შემდეგ სიმღერის მასწავლებლობა დაიწყო; თვრამეტი წლის ასაკში კარგად უძღვებოდა ჯერ ხობის, ხოლო შემდეგ შუა ქვალონისა და პირველი მაისის სკოლების მოწაფეთა გუნდებს; ხეთის სასოფლო-სამეურნეო ტექნიკუმში მან სამაგალითო გუნდი ჩამოაყალიბა და მრავალი კონცერტი გამართა; სამამულო ომის წინ, ოთხი წლის განმავლობაში, ფოთის ნავსადგურის კლუბთან არსებული სიმღერისა და ცეკვის ანსამბლს ხელმძღვანელობდა; 1939 წელს წარმატებით გაიარა თბილისში ხალხური შემოქმედების სახლის მიერ მოწყობილი საგუნდო-სადირიჟორო კურსები; ამან კიდევ უფრო გააღრმავა მისი სასიმღერო შესაძლებლობები; 1942-1961წწ. იგი ალექსანდრე ბერაიასთან ერთად ხობის რაიონის კულტურის სახლის სიმღერისა და ცეკვის ანსამბლს უძღვებოდა; ამ ანსამბლმა მრავალ დათვალიერებასა და ოლიმპიადაში მიიღო მონაწილეობა და კარგი შედეგებიც მოიპოვა; 1961 წელს ვლადიმერ ალანიას მიერ ჩონგურზე შესრულებული სხვადასხვა ხალხური მელოდია ფირზე იქნა ჩაწერილი(ამ მელოდიებს ხშირად გადმოსცემენ საქართველოს რადიოთი); ფირზეა ჩაწერილი მის მიერ შესრულებული სიმღერები: "მინდვრის დედოფალი", "საკოლმეურნეო სიმღერა", "მეჩაიეთა სიმღერა", "სიმღერა ციტრუსებზე"; საქართველოს მხატვრული თვითმოქმედების მეცხრე რესპუბლიკურ ოლიმპიადაზე ხობის რაიონული კულტსახლის სიმღერისა და ცეკვის ანსამბლმა თავი ისახელა, ანსამბლს და მის ხელმძღვანელს ვლადიმერ ალანიას მეორე ხარისხის დიპლომი მიენიჭათ.

წყარო: ხალხური სიმღერის მოამაგენი.-თბ., 2007.-გვ. 44; khobi-info.blogspot.com