აკაკი ბიბილეიშვილი

დაბადების ადგილი: სოფელი ჯიხაიში.

1930-იან წლებში თბილისში ჩამოვიდა; ერთხელ "მუშტაიდის" ბაღში მიხეილ კავსაძის გუნდის კონცერტს დაესწრო და ისე მოიხიბლა ქართლ-კახური სიმღერების მშვენიერებით, რომ გულში ჩაიდო, უთუოდ უნდა ვიმღეროო; როდესაც სერგო ბაქრაძემ მოუსმინა, პლეხანოვის სახელობის კლუბის ანსამბლში მიიწვია სოლისტად; შემდეგ ვასო კობახიძის გუნდშიც მღეროდა და ვერც მარო თარხნიშვილს უთხრა უარი, მის ანსამბლში ძლიერად ჭექდა ბიბილეიშვილის ტენორი; შემდეგ სახელმწიფო ანსამბლში მღეროდა; თავი ისახელა ხელოვნების დეკადაზე თბილისსა და მოსკოვში; შესანიშნავად გამოდიოდა საბჭოთა კავშირის მრავალ დიდ ქალაქსა და სამრეწველო ცენტრში; იყო აფხაზეთის ხალხური სიმღერისა და ცეკვის ანსამბლის სოლისტიც; ანსამბლის რეპერტუარი მისი მისვლის შემდეგ დიდად გაფართოვდა, რეპერტუარში შეიტანა აღმოსავლეთ საქართველოს სიმღერები, რომლებსაც იგი ბრწყინვალედ ასრულებდა; თუ საჭიროება მოითხოვდა ანსამბლს ნიჭიერად ლოტბარობდა; დიდი ამაგი აქვს გაწეული თავიდანვე დიდი ჯიხაიშის "შრომის" კოლმეურნეობის და სასოფლო-სამეურნეო ტექნიკუმის გუნდებზე; დაარსებული აქვს ოცამდე სხვადასხვა თვითმოქმედი კოლექტივი; საუკეთესოდ უკრავდა ფანდურზე, სალამურზე, დაირაზე, დოლზე; მრავალი წლის განმავლობაში ხელმძღვანელობდა გაგრის კულტურის სახლის სიმღერისა და ცეკვის ანსამბლს; კრასნოდარის(რუსეთი) მხარის სოფელ პლასტუნკის ქართულ მოსახლეობას დაეხმარა და შეუქმნა მომღერალთა კარგი გუნდი და მრავალი კონცერტი გაამართინა როგორც ადგილობრივ, ისე სოჭის, გაგრის, სოხუმის და შავი ზღვის სხვა სანაპირო კურორტებზე; 1962 წელს ქ. სოხუმში დაბადებიდან ორმოცდაათი და მოღვაწეობის ოცდაათი წლის აღსანიშნავ იუბილეზე, ფართოდ იქნა გაშუქებული დაუღალავი მუშაობა ხალხური სიმღერის წინსვლის საქმეში; ლოტბარი.

წყარო: ხალხური სიმღერის მოამაგენი.-თბ., 2007.-გვ. 62

• 1958 - საქართველოს დამსახურებული არტისტი