გრიგოლ გარუჩავა

დაბადების ადგილი: სოფელი იანეული, ჩოხატაურის რაიონი.

დაამთავრა ქ. ბათუმის აღრიცხვა-ანგარიშების სპეციალური ერთწლიანი სასწავლებელი.

მუშაობდა სტატისტიკოს-ეკონომისტად და მგეგმავად აჭარისა და საქართველოს სხვადასხვა რაიონებში; 1936 წლიდან ცხოვრობდა თბილისში; აქ ჩაირიცხა მსახიობ-მომღერლად დასავლეთ საქართველოს სიმრერისა და ცეკვის სახელმწიფო ანსამბლში(ხელმძღვანელი კირილე პაჭკორია), რომელთანაც ერთად გაინაწილა სასიხარულო მიღწევები მოსკოვსა და ლენინგრადში გამართულ ქართული ხელოვნების პირველ დეკადაზე; ანსამბლთან ერთად მოიარა საბჭოთა კავშირის მრავალი რესპუბლიკა და ოლქი, წარმატებით მღეროდა და ცეკვავდა; ჩონგურსა და ფანდურზე დაკვრის შესანიშნავი ოსტატი გაგზავნეს მოსკოვში ხალხურ საკრავებზე დამკვრელთა შეჯიბრში მონაწილეობის მისაღებად, სადაც ლაურეატი გახდა; რადიოში ხშირად ისმოდა მის მიერ ჩონგურზე და ფანდურზე ვირტუოზულად შესრულებული ხალხური საცეკვაო მელოდიები; გახსნის დღიდან ამიერკავკასიის რკინიგზელ ბავშვთა მხატვრული აღზრდისა და ტექნიკური პროპაგანდის სახლის მეჩონგურეთა ანსამბლის მხატვრული ხელმძღვანელი იყო; პარალელურად ავქსენტი მეგრელიძეს ეხმარებოდა რადიოკომიტეტის გუნდში; 1951 წელს მხატვრული  აღზრდის სახლიდან თბილისის პიონერთა და მოსწავლეთა სასახლის მეჩონგურე ბავშვთა ანსამბლის ხელმძღვანელად გადაიყვანეს, სადაც დიდი მონდომებით იმუშავა; ლოტბარი.

წყარო: ხალხური სიმღერის მოამაგენი.-თბ., 2007.-გვ. 72