ლეო ბერიძე

დაბადების ადგილი: დაბა ცაგერი, ცაგერის რაიონი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი სამრეწველო და სამოქალაქო მშენებლობის სპეციალობით 1950 წელს.

იმავე წელს მუშაობა დაიწყო სახელმწიფო-საპროექტო ინსტიტუტ "თბილქალაქპროექტში" ინჟინერ-მგეგმავად; 1956 წელს მუშაობა გააგრძელა სახელმწიფო საპროექტო ინსტიტუტ "საქშახტპროექტში" ჯგუფის, განყოფილების უფროსად; 1961-1966წწ. მუშაობდა საპროექტო ინსტიტუტ "საქქალაქმშენსახპროექტში" არქიტექტურულ ბიუროს ხელმძღვანელობდა, იყო პროექტის მთავარი ინჟინერი; 1969 წელს დაინიშნა რესპუბლიკური გაერთიანება "ცეკავშირის" საპროექტო ბიუროს მთავარი ინჟინრის მოადგილედ, ხოლო 1974 წლიდან სიცოცხლის ბოლომდე რესპუბლიკური გაერთიანება "საქკოლმშენის" საპროექტო ინსტიტუტ "საქკოლმშენპროექტის" მთავარი ინჟინერი იყო; მისი უშუალო მონაწილეობითა და ავტორობით დამუშავებულია ათობით რეალიზებული ობიექტის პროექტები. მათ შორის: კულტურის სახლები ქ. ტყვარჩელსა და ქ. ტყიბულში (1952-1954წწ.), "საქშახტმშენის" ადმინისტრაციული შენობა (არქიტექტორულ ჯგუფთან თანაავტორობით - 1950-1959წწ), საბაგირო გზა მთაწმინდაზე (1956წ.), მიწისზედა შენობების რეკონსტრუქციის პროექტი ქ. შახტში (1957წ.), სამთო-გამამდიდრებელი კომბინატისა და მის რეგიონში საცხოვრებელი სახლების დასახლების პროექტი ონის რაიონის სოფ. ირში (1955-1957წწ.), "ტყიბულქვანახშირის" ადმინისტრაციული შენობის ქ. ტყიბულის ცენტრში (1955-1956წწ.), ცენტრალური სპორტული სტადიონი ქ. შახტში (1955წ.), რესპუბლიკურ გაერთიანება "ცეკავშირის" პანსიონატი 250 საწოლზე კურორტ საირმეში, სანატორიული კომპლექსი ბორჯომის რაიონის დაბა ლიკანში (1973წ), საცხოვრებელი კომპლექსები სოფ. უდაბნოსა და ზემო ყანდაურში (1976-1980წწ.), მეცხოველეობის კომპლექსები მეჯვრისხევში, აბაშის რაიონის სოფ. ანჯელში და სხვ.; აღსანიშნავია, რომ წლების განმავლობაში იყო წარმატებული სპორტსმენი, რესპუბლიკური ნაკრების წევრი კრივში; მონაწილეობდა საქართველოსა და სსრკ ჩემპიონატებში; რამდენიმე სახელმწიფო ჯილდოს მფლობელი.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.84

• საქართველოს ჩემპიონი კრივში
• საბჭოთა კავშირის ჩემპიონი კრივში
• საქართველოს დამსახურებული ინჟინერი