გიორგი ვარდიაშვილი

დაბადების ადგილი: სოფელი ალმატი, ყვარლის რაიონი.

დაამთავრა თბილისის საფერშლო სკოლა.

ბავშვობიდანვე დიდ ინტერესს იჩენდა ხალხური სიმღერებისა და ხალხური საკრავების მიმართ(ფანდური); ყმაწვილობისას სახალხო არტისტის, მარო თარხნიშვილის გუნდში ირიცხებოდა; ამ გუნდისათვის საკრავებით დიდი დახმარება აქვს გაწეული; თანდათან ცალკე გამოსვლებსაც ახერხებდა; ფილარმონიის მსახიობად ჩაირიცხა და საჯარო კონცერტებში ყოველთვის წარმატებით გამოდიოდა, განსაკუთრებით მოსწონდათ მის მიერ ფანდურზე დამღერებული "შაირები", რომლებსაც ხალხური კოლორიტით ასრულებდა; სხვადასხვა მუშათა კლუბებში მცირერიცხოვან ანსამბლებს ხელმძღვანელობდა; ფანდურის მასობრივად გამოყენების ინიციატივა და პოპულარიზაცია მისმა უნარმა განაპირობა; მოსკოვში გამართული ხალხური ხელოვნების პირველ დეკადაზე აღმოსავლეთ საქართველოს სიმღერისა და ცეკვის ანსამბლის ინსტრუმენტალური ნაწილის ხელმძღვანელად იყო მიწვეული; ფანდურზე დამკვრელი ოცი ქალი მოამზადა და სანდრო კავსაძეს გვერდი დაუმშვენა; ომის წლებში და შემდეგაც, გარდაცვალებამდე, მას ერთი წუთითაც არ შეუწყვეტია ხალხის სამსახური, ანსამბლში თუ ცალკე, წარმატებით გამოდიოდა და საყვარელ საქმეს შეალია მთელი თავისი ძალ-ღონე.

წყარო: ხალხური სიმღერის მოამაგენი.-თბ., 2007.-გვ. 92

• საპატიო ნიშნის ორდენი