ჯონი ბიჭიაშვილი

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი 1956 წელს.

1956-1959წწ. მუშაობდა საპროექტო ინსტიტუტ "საქსახპროექტში" სამრეწველო ნაგებობათა დაპროექტების განყოფილების ინჟინერ-კონსტრუქტორად; 1959-1969წწ. - "სოიუზპრომმექანიზაციის" მოსკოვის საპროექტო-საკონსრტუქტორო განყოფილებაში პროექტების მთავარ ინჟინრად, შემდეგ კი - განყოფილების უფროსის მოადგილის თანამდებობაზე; ავტორია სტავროპოლისა და ვოლგოგრადის რეგიონებში განხორციელებული საბაგირო გზების მშენებლობის პროექტების; 1969-1971წწ. მუშაობდა ამიერკავკასიის ჰიდრო-მეტეოროლოგიის სამეცნიერო-კვლევით ინსტიტუტში უფროს მეცნიერ-მუშაკად. ამ პერიოდში მისი ზედამხედველობით განხორციელდა გარდაბნის ტერიტორიაზე და რკინაბეტონის კონსტრუქციების კათედრაზე, ასაწყობი რკინაბეტონის ღვარცოფდამცავი სივრცითი კონსტრუქციების ექსპერიმენტული გამოკვლევა; 1971 წლიდან იყო საქართველოს პოლიტექნიკური ინსტიტუტის დოცენტი, პროფესორი, ჯერ მშენებლობის ორგანიზაციისა და მექანიზაციის, ხოლო შემდგომ სამშენებლო მანქანებისა და მექანიკური მოწყობილობების კათედრაზე; 1964-1967წწ. სწავლობდა მოსკოვის "მრეწმანქანათმშენებლობის" სამეცნიერო-კვლევითი ინსტიტუტის ასპირანტურაში და 1968 წელს მოსკოვის პოლიტექნიკურ ინსტიტუტში დაიცვა საკანდიდატო დისერტაცია, ხოლო 1988 წელს ლენინგრადის პოლიტექნიკურ ინსტიტუტში აკადემიკოს ლურიეს კათედრაზე სადოქტორო დისერტაცია; 1992-1997წწ. მუშაობდა საქართველოს დავით აღმაშენებლის სახელობის უნივერსიტეტის პრორექტორად, სპეცდისციპლინების კათედრის გამგედ. ავტორია 100-ზე მეტი სამეცნიერო ნაშრომისა, რომელთა შორის 20 მონოგრაფია, სახელმძღვანელო და დამხმარე სახელმძღვანელოა.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.91-92

• საქართველოს საინჟინრო და ბიზნესის მეცნიერებათა აკადემია, წევრი

• მშენებლობის ორგანიზაცია, მექანიზაცია, ავტომატიზაცია, დაგეგმვა და მენეჯმენტი (თანაავტორი) // წ. 3 : მშენებლობის ავტომატიზაცია . - თბილისი, ლეგა, 2009. - 792გვ.. - ISBN: 978-9941-9107-3-9
• მშენებლობის ორგანიზაცია, მექანიზაცია, ავტომატიზაცია, დაგეგმვა და მენეჯმენტი (თანაავტორი) // წ. 1. ნაწ. 1. - თბილისი, ლეგა, 2008. - 376გვ.. - ISBN: 978-9941-9033-0-4
• კიდული საბაგირო გზების მიმმართველი შკივების დაყვანილი წონის განსაზღვრის საკითხისათვის (ავტორი). - თბილისი, საქ. სამეცნ-ტექნ. ინფორმაციისა და ტექნ-ეკონ. გამოკვლევათა სმეცნ-კვლევ. ინ-ტი, 1969. - 7გვ.