ვახტანგ ბოლქვაძე

დაბადების ადგილი: ქ. თბილისი.

დაამთავრა თბილისის სამშენებლო ტექნიკუმი 1949 წელს, საქართველოს პოლიტექნიკური ინსტიტუტი ავტომაგისტრალებისა და საქალაქო გზების მშენებლობის სპეციალობით 1953 წელს.

1953-1954წწ. მუშაობდა ალმა-ათაში (ყაზახეთის სსრ) სამოქალაქო საცხოვრებელ ნაგებობათა მშენებლობის სამინისტროს სისტემაში; 1954-1976წწ. სსრკ სახელმწიფო-საგზაო საპროექტო ინსტიტუტის ("სახავტოგზაპროექტი") თბილისის ფილიალის საგზაო განყოფილებაში - ინჟინრად, საძიებო პარტიისა და ექსპედიციის უფროსად, პროექტის მთავარ ინჟინრად; 1976-1988წწ. საგზაო განყოფილების უფროსად; 1988-1992წწ. ამავე ინსტიტუტის ტექნიკური განყოფილების მთავარ სპეციალისტად; 1992-2001წწ. კონცერნ "საქგვირაბმშენის" საპროექტო ფილიალ "პროექტის" დირექტორის მოადგილედ; 1960-1964წწ. მივლინებული იყო ავღანეთში "კუშკა-ჰერატ-ყანდაღარის" საავტომობილო გზის დაპროექტება-მშენებლობაზე მუშა-პროექტების ჯგუფის უფროსის მოადგილედ; 1969-1971წწ. კუბის რესპუბლიკაში - პროექტის მთავარ ინჟინრად; მონაწილეობდა საავტომობილო გზებისა და მასზე მდებარე საინჟინრო ნაგებობების, კერზოდ, "ჯვარი-ხაიშის", "ანგრენ-კოკანდის" ახალი და ქ. ტაშკენტის შემოსავლელი გზების (უზბეკეთის სსრ), "ტუაფსე-ხადიჟენსკისა" და "სიმფეროპოლ-იალტის" გზების (რუსეთი), "კიურდამირ-ევლახისა" და "შამქორ-განჯის" (აზერბაიჯანის სსრ) გზების დაპროექტებაში; როგორც პროექტის მთავარი ინჟინერი, უშუალოდ ხელმძღვანელობდა ყარაყუმის უდაბნოში (თურქმენეთი) "ტახტაბაზარ-კერკის" 300 კმ-იანი, კასპიის ზღვის აღმოსავლეთი სანაპიროს გასწვრივი "პრიჩალ-ჰასანყულის" 80 კმ-იანი გზების რეკონსტრუქციის დაპროექტებას.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.96

• კუბის საელჩოს საპატიო სიგელი
• შრომის ვეტერანის მედალი