თამაზ ბოჭორიძე

დაბადების ადგილი: ქ. თბილისში.

დაამთავრა საქართველოს სასოფლო-სამეურნეო ინსტიტუტი სატყეო მეურნეობის ინჟინრის კვალიფიკაციით 1961 წელს; საქართველოს პოლიტექნიკური ინსტიტუტი ხის მექანიკური დამუშავების ტექნოლოგიის სპეციალობით 1968 წელს.

1961-1965წწ. მუშაობდა ამიერკავკასიის ტყეთმოწყობის საწარმოში ინჟინერ-ტექნიკოსად; 1966 წელს საქართველოს მშენებლობის სამინისტროს ხის დამამუშავებელი კომბინატის საამქროს უფროსად; 1968-1996წწ. ამავე საწარმოს, შემდეგ კი გაერთიანება კომბინატ "მშენებლის" დირექტორად; 1996 წლიდან სიცოცხლის ბოლომდე სათავეში ედგა მის მიერ დაარსებულ სააქციო საზოგადოება "მუხას"; უშუალოდ ხელმძღვანელობდა ხის ნაკეთობებით საქართველოს მშენებლობის სამინისტროს საბინაო, კულტურულ-საგანმანათლებლო და ადმინისტრაციული დანიშნულების ობიექტების მშენებლობის დაკომპლექტებას; მონაწილეობდა თბილისის ზ. ფალიაშვილის სახელობის ოპერისა და ბალეტის სახელმწიფო აკადემიური თეატრის აღდგენით სამუშაოებში, სასტუმრო "ივერიისა" და ა. გრობოედოვის სახელობის რუსული დრამატული თეატრის მშენებლობაში; როგორც ქველმოქმედი, აქტიურად იყო ჩართული ფარახეთის, ალვანის, ნიკორწმინდის, კვირაცხოვლისა და თბილისში სამტრედიის ქუჩაზე მდებარე ეკლესიების აღდგენაში. 2001 წელს გახდა საქართველოს წარჩინებული ბიზნესმენი.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.98; წიგნი ღირსებისა: ტ. 3/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2001. - გვ.267

• 1998 - ღირსების მედალი
  სამშენებლო სფეროში მიღწეული წარმატებისთვის, მსხვილი ობიექტების მშენებლობაში შეტანილი დიდი წვლილისა და შენობა-ნაგებობების აღდგენა-რესტავრაციის დროს გამოჩენილი მაღალი პროფესიონალიზმისათვის
• მედალი "შრომითი მამაცობისთვის"