გივი გამყრელიძე

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტი ინჟინერ-ელექტრიკოსის კვალიფიკაციით 1953 წელს.

1953 წელს მუშაობა დაიწყო "საქენერგოს" სისტემაში; 1957 წლიდან იყო თბილისის N2 სამშენებლო-სამონტაჟო ტრესტ "სურსათმშენმონტაჟის": ინჟინერი, სამუშაოთა მწარმოებელი, მექანიზაციის სამმართველოს მთავარი ინჟინერი, უფროსი; N9 სამშენებლო-სამონტაჟო სამმართველოს უფროსი; იყო საქართველოს მშენებლობის სამინისტროს ახალჩამოყალიბებული სამშენებლო ტრესტ "სპეცმშენის" მთავარი ინჟინერი, საქართველოს სასოფლო მშენებლობის სამინისტროს N9 სამონტაჟო ტრესტის მმართველი; 1977 წელს დაინიშნა საქართველოს მინისტრთა საბჭოსსპეციალიზებულ სამშენებლო-სამონტაჟო სამუშაოთა მთავარი სამმართველოს ("საქმთავარმონტაჟსპეცმშენის") უფროსის მოადგილედ, 1979 წლიდან - უფროსად; სისტემის სტრუქტურული რეორგანიზაციის შემდეგ სათავეში ჩაუდგა ჰოლდინგურ კომპანია "მონტაჟსპეცმშენს"; იყო სს "მონტაჟსპეცმშენის" პრეზიდენტი; მისი თაოსნობით დაფუძნდა სამონტაჟო სამმართველო "სპეცჰელიომონტაჟი", რითაც დასაბამი მიეცა საქართველოში იაფი და ეკოლოგიურად სუფთა მზის ენერგიის გამოყენებას; უშუალოდ ხელმძღვანელობდა ქვეყნისთვის უაღრესად მნიშვნელოვანი სასოფლო-სამეურნეო, მსუბუქი და მძიმე მრეწველობის, ბინათმშენებლობის, სამედიცინო და საგანმანათლებლო ობიექტების მშენებლობასა და საექსპლუატაციოდ გადაცემას; აქტიურად მონაწილეობდა და ხელმძღვანელობდა რუსთავის მეტალურგიული, ზესტაფონის ფეროშენადნობთა, თბილისის ელმავალმშენებელი და ფოლადთუჯსასხმელი, ქუთაისის საავტომობილო ქარხნების, რუსთავის ქიმიური კომბინატის, საჩხერის ბამბის საქსოვი ფაბრიკის, ს/გ "ჭიათურმანგანუმის" რეკონსტრუქციისა და მოდერნიზების სამუშაოებს; კოსმოსში გასაშლელი 42 მეტრიანი ანტენის უნიკალური კომპლექსის მშენებლობას (საგურამოში); მონაწილეობდა გამოსაცდელი სტენდების ცალკეული კვანძების შერჩევასა და სწორ კონსტრუქციულ გადაწყვეტაში; მისი ხელმძღვანელობით, "საქმთავარმონტაჟსპეცმშენის" კოლექტივი აქტიურად მონაწილეობდა როგორც საქართველოში, ისე სომხეთში სტიქიით დაზარალებული რაიონების აღდგენაში.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.118; წიგნი ღირსებისა: ტ. 3/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2001. - გვ.267

• საქართველოს საინჟინრო მეცნიერებათა აკადემია, წევრ-კორესპონდენტი
• ღირსების ორდენი

• 1998 - ღირსების ორდენი
  სამშენებლო სფეროში მიღწეული წარმატებისთვის, მსხვილი ობიექტების მშენებლობაში შეტანილი დიდი წვლილისა და შენობა-ნაგებობების აღდგენა-რესტავრაციის დროს გამოჩენილი მაღალი პროფესიონალიზმისათვის
• საქართველოს დამსახურებული ინჟინერი