ვარსქენ (პიტიახში)

ვარსქენ პიტიახში, არშუშას ძე, ქვემო ქართლის მმართველი V საუკუნის 60–80-იან წლებში. ქართლის ცენტრალური ხელისუფლებისადმი ოპოზიციურად განწყობილი, აღმავალი ფეოდალური ძალების ერთ-ერთი მეთაური იყო. ცდილობდა გამოეყენებინა გარეშე ძალაც–დამპყრობელი ირანელები. ამ მიზნით მიიღო ირანში სახელმწიფო სარწმუნოებად აღიარებული მაზდეანობა. ამიტომ ვახტანგ I გორგასალმა ირანის წინააღმდეგ აჯანყება იმით დაიწყო, რომ ვარსქენ პიტიახში 482 წელს მოაკვლევინა. ვარსქენ პიტიახში იაკობ ცურტაველის "შუშანიკის წამების" ერთ-ერთი მთავარი პერსონაჟია. 

წყარო: საქართველო: ენციკლოპედია: ტ.III.–თბ., 2014. გვ.183