გრიგოლ კაპანაძე

დაბადების ადგილი: ქ. ახალციხე.

სწავლობდა ჭიათურის პედაგოგიურ ტექნიკუმში, დაამთავრა თბილისის სახელმწიფო კონსერვატორია 1942 წელს(საგუნდო-სადირიჟორო).

ხალხური და ქალაქური სიმღერები თავდაპირველად ოჯახში ისწავლა, ხოლო შემდეგ სკოლის გუნდში სანდრო კავსაძის ხელმძღვანელობით; მონაწილეობდა ჭიათურის მუშათა ცენტრალურ კლუბთან არსებული სიმებიანი ორკესტრის თვითმოქმედ წრეში; უკრავდა დომბრაზე, მანდოლინაზე, ქნარზე და ჩელოზე; 1932 წლიდან ჩელოზე დაკვრას თბილისში საკმაოდ კარგად დაეუფლა პროფესორ მინიარის დახმარებით; შემდეგ სწავლა დაიწყო კონსერვატორიასთან არსებულ მუშფაკში და ბოლოს აქვე, საგუნდო-სადირიჟორო განყოფილებაზე; პრაქტიკის მისაღებად რადიოკომიტეტის კაპელის მსახიობად მოეწყო; 1945 წლიდან ამავე კაპელის ქორმაისტერად და დირიჟორად გადაიყვანეს; მეორე და მეხუთე მუსიკალურ სკოლებში ასწავლიდა თეორიასა და სოლფეჯიოს; პარალელურად, 1943-1946წწ. თბილისის სახელმწიფო კონსერვატორიაში საოპერო-საგუნდო კურსების ინსპექტორად მუშაობდა; 1940-1949წწ. იყო მომღერალთა გუნდის ხელმძღვანელი თბილისში; რუსთავის საავიაციო სკოლაში უძღვებოდა მომღერალთა გუნდს; იყო საქართველოს სახელმწიფო კაპელის ქორმაისტერი და დირიჟორი; ცენტრალური მუსიკალური ათწლედის დირექციამ მიიწვია საგუნდო-სადირიჟორო განყოფილების თეორიული საგნების მასწავლებლად; 1957 წლიდან იყო თბილისის სახელმწიფო კონსერვატორიის საგუნდო-სადირიჟორო განყოფილების ხელმძღვანელი.

წყარო: ხალხური სიმღერის მოამაგენი.-თბ., 2007.-გვ.119

• 1962 - საქართველოს დამსახურებული მასწავლებელი
• საქართველოს უმაღლესი საბჭოს სიგელი