ზურაბ გედენიძე

დაბადების ადგილი: ქ. ოზურგეთი.

დაამთავრა პოლიტექნიკური ინსტიტუტის ქუთაისის ფილიალის სამშენებლო ფაკულტეტი სამრეწველო და სამოქალაქო მშენებლობის სპეციალობით 1975 წელს.

1967-1970წწ. მუშაობდა ქუთაისის სამონტაჟო სამმართველოში "ფოლადკონსტრუქცია" ოსტატად; 1970-1972წწ. საქართველოს მშენებლობის სამინისტროს ტრესტ "საქმშენინდუსტრიის" ქუთაისის N2 რკინაბეტონის ქარხანაში უფროსი ლაბორანტი იყო; 1972-1974წწ. სავალდებულო სამხედრო ობიექტების  მშენებლობაზე; 1975-1977წწ. საქართველოს მშენებლობის სამინისტროს ქუთაისის N4 სამშენებლო ტრესტის N9 სამშენებლო სამმართველოს ინჟინერი იყო; 1977-1984წწ. მუშაობდა საბჭოთა კავშირის ელექტროტექნიკური მრეწველობის სამინისტროს ქუთაისის სამშენებლო სამმართველოს უბნის უფროსად; 1985 წლიდან მუშაობს საქართველოს ძეგლთა დაცვის მთავარი სამმართველოს სამშენებლო-სამეცნიერო გაერთიანების დასავლეთ საქართველოს სახელოსნოში N1 უბნის უფროსად; ხელმძღვანელობს მის მიერ დაფუძნებულ შპს "კირითხუროს", რომელიც ძირითადად საქართველოს ეკლესია-მონასტრების რესტავრაციის სამუშაოებს ასრულებს; მისი მონაწილეობით რესტავრირებულია: გელათის ძირითადი ტაძარი, გელათის წმ. გიორგის ეკლესია, უბისის წმ. გიორგის ეკლესია, შესრულებულია ბაგრატის ტაძრის საბოლოო აღდგენითი სამუშაოები - დასავლეთის კარიბჭე, სამხრეთის მკლავი, აღმოსავლეთის ციტადელის კედელი; ხობის დედათა მონასტერი, სეფიეთის ეკლესია, ლიხაურის წმ. გიორგის ეკლესია, სხალთის ეკლესია, გონიოს ციხე, ნიკორწმინდა, ხოტევის წმ. გიორგის ეკლესია; 1995-2008წწ. მუშაობს ბაგრატის ტაძრის კლავების გადახურვაზე, გელათის აკადემიის სრული კონსერვაციის სამუშაოებზე, ხიმშის წმ. გიორგის ეკლესიის (მეორე საბოლოო) რესტავრაციაზე.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.129-130