ივანე გოგელია

დაბადების ადგილი: ქ. ლანჩხუთი.

დაამთავრა საქართველოს პოლიტექნიკური ინსტიტუტის სამშენებლო ინსტიტუტის სამშენებლო ფაკულტეტი 1945 წელს.

1945 წელს მუშაობა დაიწყო სამშენებლო-სამონტაჟო ტრესტ "საქკვებმრეწვმონტაჟის" სისტემაში - იყო სამუშაოთა მწარმოებელი, სამმართველოს მთავარი ინჟინერი, უფროსი; 1959 წელს დაინიშნა საქართველოს მშენებლობის სამინისტროს N2 სამშენებლო ტრესტის მმართველის მოადგილედ, 1962 წელს - ამავე სამინისტროს N3 სამშენებლო ტრესტის საწარმოო კომბინატის დირექტორად; 1964 წლიდან მუშაობდა საქართველოს მშენებლობის სამინისტროს N2 ტრესტის მთავარ ინჟინრად; 1971 წლიდან იყო საქართველოს სასოფლო მშენებლობის სამინისტროს N2 ტრესტის მმართველი, ხოლო 1974 წლიდან - მინისტრის მოადგილე; 1985 წელს დაინიშნა საქართველოს მშენებლობის მინისტრის მოადგილედ, 1986 წელს კი - გაერთიანება "საქაგრომშენის" თავმჯდომარის მოადგილედ; 1990 წელს აირჩიეს კონცერნ "სოფლმშენის" ვიცე-პრეზიდენტად; 1991-2000წწ. მუშაობდა გაერთიანება "მშენუზრუნველყოფის" მთავარ ინჟინრად; მისი უშუალო ხელმძრვანელობით აშენდა ივანე ჯავახიშვილის სახელობის თსუ-ს მაღლივი კორპუსი, მეღვინეობა-მევენახეობის ინსტიტუტის კომპლექსი, სასოფლო-სამეურნეო ინსტიტუტის შენობა, კინოსტუდია "ქართული ფილმის" ახალი  კომპლექსი; თბილისის კონიაკისა და ღვინის ქარხნები, საკონდიტრო და რძის კომბინატები, ჩადგა მწყობრში ელევატორები - კაჭრეთში, მარნეულში, ოჩამჩირეში, ჩაისა და ღვინის გადამამუშავებელი საწარმოები, ხორცისა და რძის უმსხვილესი კომბინატები ბათუმსა და ქუთაისში; მესაქონლეობისა და სასათბურე კომპლექსები კოდაში, გამარჯვებაში, ჯანდარაში, საგარეჯოში, კასპში, თამარისში, ზუგდიდსა და ოჩამჩირის რაიონებში; განახლდა და რესტავრირებულ იქნა თბილისის ძველი საცხოვრებელი უბნები; იყო მეორე მსოფლიო ომის მონაწილე და მრავალი საბრძოლო ჯილდოს მფლობელი. მიღებული აქვს საქართველოს მინისტრთა საბჭოს პრემია.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.149; წიგნი ღირსებისა: ტ. 3/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2001. - გვ.173

• 1998 - ღირსების ორდენი
  საქართველოში სოციალურ-კულტურული, სოფლის მეურნეობისა და გადამამუშავებელი მრეწველობის ობიექტების მშენებლობაში შეტანილი განსაკუთრებული პირადი წვლილისა და ნაყოფიერი მოღვაწეობისათვის
• საქართველოს დამსახურებული ინჟინერი