ვლადიმერ გოგოლაძე

დაბადების ადგილი: სოფელი გოგოლესუბანი, ჩოხატაურის რაიონი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი 1953 წელს.

შრომითი საქმიანობა დაიწყო რუსეთში - გორკის ოლქში მშენებელ ოსტატად; 1973 წლამდე, რუსეთში საქმიანობის პერიოდში, სხვადასხვა სამშენებლო ორგანიზაციაში მუშაობდა ხელმძღვანელ თანამდებობებზე. იყო მოსკოვის სპეციალიზებული სამშენებლო ტრესტის მმართველი; 1973 წელს გადმოვიდა თბილისში და მუშაობა დაიწყო საქართველოს მშენებლობის სამინისტროს N3 სამშენებლო ტრესტ "თბილმრეწვმშენის" მმართველად და, თავისი ძალისხმევით, ჩამორჩენილი ტრესტი მოწინავეთა რიგებში ჩააყენა; 1980 წელს დაინიშნა საქართველოს მშენებლობის მინისტრის პირველ მოადგილედ; 1981-1984წწ. იყო საქართველოს მშენებლობის მინისტრი; 1984 წელს გადაიყვანეს მოსკოვში საკავშირო მშენებლობის მინისტრის მოადგილედ; 1994 წელს დაინიშნა მოსკოვის ერთ-ერთი სამშენებლო გაერთიანების გენერალურ დირექტორად; ხელმძღვანელობდა თბილისში არაერთი სამრეწველო და საზოგადოებრივი ობიექტის გაფართოება-განახლებასა და მშენებლობას. მათ შორისაა: "დინამოს" ცენტრალური სტადიონი, ჩარხმშენებელი ქარხანა, მაუდ-კამვოლის კომბინატი, ხორცისა და რძის კომბინატი, უნივერმაღი "თბილისი", ა. გრიბოედოვის სახელობის რუსული დრამატული თეატრი და სხვა; მშენებლობის მინისტრად მისი მოღვაწეობის პერიოდში ამ უწყებამ საქართველოში რამდენიმე მილიონი კვადრატული მეტრი ფართობის საცხოვრებელი სახლები და სოციალური დანიშნულების ობიექტები (სკოლები, საბავშვო ბაღები, საავადმყოფოები და პოლიკლინიკები) ააშენა; საგრძნობლად გაუმჯობესდა მშენებლობის ხარისხი და მისი ეკონომიკური მაჩვენებლები.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.156-157; წიგნი ღირსებისა: ტ. 5 / შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2003. - გვ.33

• 2000 - ღირსების ორდენი
• რუსეთის დამსახურებული ინჟინერი
• საქართველოს დამსახურებული ინჟინერი