ნუგზარ გოგუა

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის გეოლოგიის ფაკულტეტი 1980 წელს; მარქსიზმ-ლენინიზმის უნივერსიტეტის პოლიტეკონომიისა 1987 წელს და თბილისის ეკოლოგიურ-ეკონომიკური ინსტიტუტის იურიდიული ფაკულტეტები.

1980-1982წწ. მუშაობდა რესპუბლიკურ სამმართველო "საქგეოლოგიის" თბილისის სპეციალიზებულ ჰიდროგეოლოგიურ პარტიებში: ტექნიკოს-გეოლოგად; 1982-1983წწ. გეოლოგად; 1983-1992წწ. ჰიდროგეოლოგიური და საინჟინრო-გეოლოგიური ექსპედიციის შავი ზღვის საინჟინრო-გეოლოგიური პარტიის უბნისა და პარტიის უფროსად; 1992-1995წწ. იყო საქართველოს გეოლოგიის სახელმწიფო დეპარტამენტის შავი ზღვის ლითომონიტორინგული კვლევების ცენტრის უფროსი; 1995-1999წწ. სს ბუნების სტიქიური პროცესებისა და საინჟინრო-გეოლოგიური კვლევების ცენტრ "სტიქიის" მთავარი ინჟინერი; 1999 წლიდან ხელმძღვანელობდა გეოლოგიის სახელმწიფო დეპარტამენტის საინჟინრო-გეოლოგიური კვლევების ცენტრ შპს "საინჟგეოს"; მონაწილეობდა საქართველოს ატომური ელექტროსადგურის მოედნების, ქარხანა "რადიანის", მარნეულის მანქანათმშენებელი ქარხნის პროექტებთან დაკავშირებულ საინჟინრო-გეოლოგიურ კვლევებში; ბავშვთა ქალაქ "მზიურის" საპროექტო-საძიებო სამუშაოებში; საშიშ სტიქიურ გეოლოგიურ პროცესებზე რეჟიმული დაკვირვების საყრდენი ქსელების მოწყობა-მონიტორინგის და ენგურის ჰიდროკვანძის სადერივაციო გვირაბისა და მიმდებარე ტერიტორიების მდგომარეობის შეფასების საინჟინრო-გეოლოგიურ და ჰოდროგეოლოგიურ სამუშაოებში; სპიტაკისა (სომხეთი, 1988), რაჭა-ლეჩხუმის (1991) და თბილისის (2003) მიწისძვრების შედეგთა სალიკვიდაციო მუშაპროექტების შემუშავებაში; ხელმძღვანელობდა საინჟინრო-გეოლოგიურ სამუშაოებს ბათუმში (ჩვიდმეტსართულიანი სასტუმროს პროექტისთვის), "ბრითიშპეტროლიუმის" დასავლეთის მიმართულების საექსპორტო ნავთობსადენისა და "ბაქო-თბილისი-ჯეიჰანის" გაზსადენის ტრასის ტექნიკურ უზრუნველყოფასთან დაკავშირებულ კვლევებს; სუფსის, ყულევი-ფოთისა და ახალციხის ნავთობპროდუქტების ტერმინალებზე, სუფსის ქიმიურ და საგარეჯოს ნავთობპროდუქტების გადამამუშავებელ ქარხნებზე, თბილისი-ბოლნისისა და დასავლეთის მიმართულების ბოჭკოვან-საკაბელო ტრასაზე ჰიდროგეოლოგიური და საინჟინრო-გეოლოგიური კვლევების ჩატარებას; მდინარე ბჟუჟას ფილტრატების საექსპლუატაციო რესურსების, სოფ. ჩიხას (საჩხერის რაიონი) ტერიტორიაზე ინერტული მასალების საბადოსა და მცხეთის რაიონში ცეოლითის მარაგების გათვლისა და სხვა სტრატეგიულ პროექტებს.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.158-159

• ევროპის ინჟინერ-გეოლოგთა ასოციაცია, წევრი
• ევროპის მეცნიერ-გეოლოგთა ასოციაცია, წევრი