ალექსანდრე გარსევანიშვილი

დაბადების ადგილი: ქ. გორი.

სწავლობდა თბილისის გიმნაზიაში (1840-1850-იანი წლები). რელიგიურ მოღვაწეთა ცხოვრებასა და ისტორიულ თემებზე აქვეყნებდა წერილებს ("აღწერა სტამბოლის აღებისა ოსმალებისა ანუ თურქებისაგან", "უკანასკნელი დაქცევა წმიდისა ქალაქისა იერუსალიმისა" და სხვ.). აღწერილი აქვს ქალაქი გორიც. თანამშრომლობდა ჟურნალებში: "ცისკარი" (1866-1871), "საქართველოს სასულიერო მახარებელი" (1868), "გუთნის დედა" (1865-1867). ამ უკანასკნელში დაბეჭდილი აქვს წერილი შინაური პირუტყვის მოვლასა და მკურნალობაზე. მისი ორმოქმედებიანი კომედია "ცოლები დავკარგეთ" (გამოიცია 1880) 1880-იან წლებში იდგმებოდა თბილისისა და სოფლის სცენებზე.

წყარო: საქართველო: ენციკლოპედია: ტ.I.–თბ., 1997. გვ.563; ქართველ მოღვაწეთა ნეკროპოლი. წ. 1/ შეადგ., წინასიტყვაობა, შენიშვნები და საძიებელი დაურთო სოლომონ ხუციშვილმა. -თბ., 1961. -გვ.31