გივი ცერაძე

დაბადების ადგილი: ქ. ცხინვალი.

1950 წელს ვაჟთა მე-2 საშუალო სკოლის და მ. ტუგანოვის სახელობის სამხატვრო სკოლის დამთავრების შემდეგ, 1950-1956წწ. სწავლობდა თბილისის სამხატვრო აკადემიის ფერწერის ფაკულტეტზე. მისი სადიპლომო ნამუშევარი "ჩემი სამშობლო" (პეიზაჟების სერია) ექსპონირებულ იქნა მოსკოვის გამოფენაზე.

1961-1974წწ. მუშაობდა თბილისის მოზარდ მაყურებელთა რუსული თეატრის მთავარ მხატვრად; 1958-1979წწ. მოღვაწეობდა შოთა რუსთაველის სახელობის სახელმწიფო თეატრალურ ინსტიტუტში; 1969-1975წწ. თბილისის სახელმწიფო უნივერსიტეტის ხელოვნებათმცოდნეობის ფაკულტეტზე ფერწერის კურსს კითხულობდა. მის მიერ გაფორმებული სპექტაკლებიდან აღსანიშნავია: მარჯანიშვილის თეატრში: ა. კრონინის "ბროუდონის ციხე-სიმაგრე", ი. ოტჩენნაშეკის "რომეო, ჯულიეტა და წყვდიადი", კ. გოლდონის "ორი ბატონის მსახური"; ბათუმის თეატრში: ა. შერვაშიძის "კლდის სიმღერა", ა. წერეთლის "კინტო", ნ. დუმბაძის, გ. ლორთქიფანიძის "მე, ბებია, ილიკო და ილარიოანი", ა. ჟერის "მეექვსე სართული", ი. ზაკისა და ა. კუზნეცოვის "ფეხბურთელები"; გრიბოედოვის თეატრში: ე. შვარცის "ჩრდილი"; რუსთავის თეატრში: ა. ზურაბოვის "ლიკა"; ცხინვალის თეატრში: გ. ნახუცრიშვილის "ფიროსმანი", მ. ელიოზიშვილის "ყველგან, ყველასათვის"; რიგის მოზარდ მაყურებელთა თეატრში: ნ. დუმბაძის, გ. ლორთქიფანიძის "მე ვხედავ მზეს", უ. შექსპირის "ჰამლეტი". მისი პერსონალური ნამუშვრების გამოფენები მოეწყო თბილისის მხატვრის სახლში 1989 წელს და მოსკოვში, არბატზე, საქართველოს წარმომადგენლობის "მზიურის" საგამოფენო დარბაზში 1990 წელს.

წყარო: საიუბილეო თარიღები: თეატრი, მუსიკა, კინო.- თბ., 1991. -გვ.53

• 1967 - საქართველოს დამსახურებული მხატვარი