დიმიტრი გაგუა

დაბადების ადგილი: სოფელი ბუკნარი, ჩოხატაურის რაიონი.

დაამთავრა თბილისის წითელ თეატრთან არსებული სტუდია 1924 წელს და მოსკოვის ა. ზავადსკის თეატრალური სტუდია 1928 წელს.

სხვადასხვა წლებში მუშაობდა: თბილისის წითელ (შემდგომში მუშათა, 1924-1927), სოხუმის (1928-1929), ქუთაისის (1930-1931, 1935-1937), მარჯანიშვილის (1931-1932), რადიოკომიტეტში დიქტორად და რეჟისორად (1932-1933), ბაქოს ქართულ (1933-1934), ქუთაისის წითელი არმიის (1934-1935), რუსთაველის (1937-1961) თეატრებში. 1946-1947 წლებში ხელმძღვანელობდა ბორჯომის თეატრს, შემდგომში მუშაობდა ცხინვალის თეატრის რეჟისორად. დ. გაგუა წლების მანძილზე იყო საზოგადოება "ცოდნის" წევრი და კითხულობდა ლექციებს თეატრალური ხელოვნების საკითხებზე: "ყოფაქცევა და მეტყველების კულტურა", "მხატვრული კითხვის საკითხები" და სხვ. მის მიერ შესრულებული როლებიდან აღსანიშნავია: ქუთაისის თეატრში - (შილერის "ყაჩაღები"); სოხუმის თეატრში - სიმონა (ეგ. ნინოშვილის "ჯანყი გურიაში"); მარჯანიშვილის თეატრში - წამყვანი (ნ. პოგოდინის "ფოლადის პოემა"), პროფესორი (ი. მიკიტენკოს "აანთეთ ვარსკვლავები"), სევასტი (პ. კაკაბაძის "ყვარყარე თუთაბერი"), ჭაღარა, კახა, გულბათი (კ. კალაძის "კაკალ გულში", "როგორ', "ხატიჯე"); რუსთაველის თეატრში-ანდუყაფარ ორბელიანი, თავადი (ს. შანშიაშვილის "არსენა", "კრწანისის გმირები"), დათიელა (შ. დადიანის "ნაპერწკლიდან"), სენატორი (შექსპირის "ოტელო"), ყარა-უსუფი (ა. სუმბათაშვილის "ღალატი"), შილინი (ვ. დარასელის "კიკვიძე"), ამბაკო (გრ. ბერძენიშვილის "ტირიფის ქვეშ"), პროფესორი, ვარლამი (გ. ქელბაქიანის "გამოცდები" და "ახალგაზრდა მასწავლებელი") და სხვ. დ. გაგუას რეჟისორობით განხორციელდა შემდეგი სპექტაკლები: ბორჯომის თეატრში - ს. მთვარაძის "სახსოვარი, აკ. წერეთლის "ბაში-აჩუკი", ეგ. ნინოშვილის" ქრისტინე"; ცხინვალის თეატრში - პ. კაკაბაძის "ყვარყვარე თუთაბერი" და სხვ.

წყარო: ხელოვნების კალენდარი: თეატრი, მუსიკა, კინო.- თბ., 1993.- გვ.58-59

• 1961 - საქართველოს დამსახურებული არტისტი