დავით დოღონაძე

დაბადების ადგილი: ქ. ქუთაისი.

დაამთავრა ქ. თბილისის ინდუსტრიული ტექნიკუმის სამშენებლო ფაკულტეტი 1934 წელს; საქართველოს პოლიტექნიკური ინსტიტუტის სამშენებლო ფაკულტეტი 1939 წელს.

1939 წელს მუშაობა დაიწყო ქ. თბილისის დარგობრივი დანიშნულების საპროექტო ინსტიტუტში ინჟინრად; 1941 წლიდან მუშაობდა საქართველოს პოლიტექნიკური ინსტიტუტის ჰიდრავლიკისა და ჰიდროტექნიკურ ნაგებობათა კათედრაზე მეცნიერ-მუშაკად; 1967 წელს იგი არჩეულ იქნა ჰიდრავლიკისა და ჰიდროტექნიკურ ნაგებობათა კათედრის პროფესორად, 1979 წელს დაინიშნა კათედრის გამგედ; პედაგოგიური და სამეცნიერო მოღვაწეობის პერიოდში გამოქვეყნებული აქვს არაერთი სამეცნიერო ნაშრომი; შეიმუშავა მეთოდური სახელმძღვანელო ჰიდრავლიკის კურსის პედაგოგებისათვის და სასწავლო სახელმძღვანელო სტუდენტებისათვის; იყო ავტორი პუბლიკაციებისა საქართველოში ჰიდრომშენებლობის წარმოებისა და ჰიდროტექნიკურ ნაგებობათა ექსპლუატაციის შესახებ; დიდი როლი ითამაშა მის მიერ მეცნიერთა ჯგუფთან ერთად შემუშავებული მეთოდებისა და რეკომენდაციების აღიარებამ და გამოყენებამ "ენგურჰესისა" და სხვა მნიშვნელოვანი ჰიდროკომპლექსების დაპროექტებისა და უშუალოდ მშენებლობის მიმდინარეობისას; იყო საბჭოთა კავშირის გამომგონებლობისა და რაციონალიზაციის სამეცნიერო-ტექნიკური საზოგადოების საქართველოს საბჭოს მდივანი და საქართველოს პოლიტექნიკური ინსტიტუტის სამეცნიერო საბჭოს წევრი; მიღებული ჰქონდა სახელმწიფო ჯილდოები, საკავშირო და რესპუბლიკური ორგანიზაციების საუწყებო საპატიო სიგელები. ტექნიკურ მეცნიერებათა კანდიდატი (1950), ტექნიკურ მეცნიერებათა დოქტორი (1966).

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.205