სიმონ ბრონევსკი

დაბადების ადგილი: სოფელი მანკოვო, ყოფილი სმოლენსკის გუბერნია, რუსეთი.

პავლე ციციანოვმა კავკასიის მთავარმართებლის კანცელარიის გამგედ დანიშნა. თბილისში მოღვაწეობით მან შეძლო კავკასიოლოგიის დარგში ადრე (1796 წლიდან) დაწყებული მუშაობის გაფართოება. არსებული ლიტერატურისა და თავისი შეკრებილი მასალის საფუძველზე გამოსცა კავკასიური ნარკვევები ორ წიგნად. პირველი წიგნი შეიცავს გეოგრაფიულ ცნობებს კავკასია-საქართველოზე. ფიზიკურ-გეოგრაფიულად დახასიათებულია ცალკეული მხარეები, განხილულია მდინარეთა ქსელი (მტკვრის, რიონის, ჭოროხის), ზღვები და ტბები, ცხოველთა სამყარო, კავკასიაში მოსახლე სხვადასხვა ხალხები, მათი რელიგია და ყოფა; აღწერილია არარატის მთისწინეთი, სამხრეთ საქართველოს მთები, ძველი დროისა და ახალი ეპოქის ვაჭრობა-ნაოსნობა მტკვრით, ფაზისით (რიონით) და ა. შ. ავტორი ამ მხარის ისტორიას თავისებურად ყოფს ბერძნულ, რომაულ, თურქულ, სპარსულ და რუსულ პერიოდებად. სიმონ ბრონევსკის ნარკვევებში ფასეულია იმდროინდელ მხარეთა აღწერა, მოსახლეობის საქმიანობის, ყოფის, ენებისა და რელიგიათა დახასიათება. მეორე წიგნში გადმოცემულია იმიერკავკასიის (ასტრახანის) წარსული და თანამედროვე მდგომარეობა; დახასიათებულია  აღმოსავლეთ ამიერკავკასიის სახანოები. სიმონ ბრონევსკის მიმოხილული აქვს რუსეთ-საქართველოს ურთიერთობის ამსახველი დოკუმენტები (დაცულია აღმოსავლური ინსტიტუტის სანქტ-პეტერბურგის განყოფილების ხელნაწერთა კოლექციაში). რუსი სახელმწიფო სამხედრო მოღვაწე. კავკასიოლოგი.

წყარო: საქართველო: ენციკლოპედია: ტ.I.–თბ., 1997.–გვ.484

• Новейшие географические и исторические известия о Кавказе, собранные и пополненные Семеном Броневским (ავტორი) // Ч. 2 : Северная сторона Кавказа ; Восточная сторона Кавказа. - Москва, Тип. С. Селивановского, 1823. - 465ст.
• Новейшие географические и исторические известия о Кавказе, собранные и пополненные Семеном Броневским (ავტორი) // Ч. 1 : Географические известия : Общие предварительные познания о Кавказе. - Москва, Тип. С. Селивановского, 1823. - 352ст.