ცისანა გოგუაძე

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის ქიმიური ტექნოლოგიების ფაკულტეტი 1954 წელს და მოსკოვის დ. მენდელეევის სახელობის ქიმიური ტექნოლოგიების ინსტიტუტის ასპირანტურა 1961 წელს.

1954 წელს მუშაობა დაიწყო საქართველოს პოლიტექნიკური ინსტიტუტის ზოგადი ქიმიური ტექნოლოგიების პროცესებისა და აპარატების კათედრაზე უფროს ლაბორანტად. 1959-1964 წლებში მივლინებული იყო მოსკოვის დ. მენდელეევის სახელობის ქიმიური ტექნოლოგიების ინსტიტუტში. 1964 წელს თბილისში დაბრუნებულმა მეცნიერმა პოლიმერების ქიმიისა და ტექნოლოგიის სფეროში გააგრძელა სამეცნიერო საქმიანობა. მისი კონკრეტული ინტერესების სფეროს ახალი მაღალმოლეკულური ნაერთების სინთეზთან და მათი სხვადასხვა სფეროში გმოყენებასთან დაკავშირებული საკითხები წარმოადგენს. 90-იან წლებში ქიმიურ-ბიოლოგიური ტექნოლოგიების ფაკულტეტზე ახალი სპეციალობა-ბიოსამედიცინო პოლიმერების ქიმია და ტექნოლოგია იხსნება და ც. გოგუაძე ამ ახალი სპეციალობის სასწავლო-საგანმანათლებო პროგრამის დამუშავებისა და საინჟინრო კადრების მომზადების ინიციატორია. იყო ქიმიური ტექნოლოგიების ფაკულტეტის დეკანის მოადგილე. ავტორია 60-ზე მეტი სამეცნიერო ნაშრომისა და სტატიისა, რომელთა უმრავლესობა უცხოურ სამეცნიერო ჟურნალში გამოქვეყნდა. მისი ავტორობით გამოცემულია დამხმარე სახელმძღვანელოები სტუდენტებისთვის; მისი ხელმძღვანელობით ბევრმა ასპირანტმა წარმატებით დაიცვა საკანდიდატო დისერტაცია; აქტიურად მონაწილეობს უნივერსიტეტის საზოგადოებრივ ცხოვრებაში. ქიმიის მეცნიერებათა კანდიდატი (1964), პროფესორი.

წყარო: საქართველოს ინჟინერი ქალები.- თბილისი.-2008.- გვ.37-39

• ტექნიკური უნივერსიტეტის ქალთა ასოციაცია, წევრი

• პრაქტიკუმი მაღალმოლეკულურ ნაერთთა ქიმიასა და ფიზიკაში : სახელმძღვ. სტუ-ს ქიმ. სპეც. სტუდ. (ავტორი). - თბილისი, სტუ, 2006. - 99გვ.. - ISBN: 99940-57-44-8