ბორის ინასარიძე

დაბადების ადგილი: სოფელი კრიხი, ამბროლაურის რაიონი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი წყალმომარაგებისა და ექსპლუატაციის სპეციალობით 1954 წელს; საქართველოს სასოფლო-სამეურნეო ინსტიტუტის მელიორაციის ფაკულტეტი 1958 წელს.

მუშაობდა საქართველოს მელიორაციისა და წყალთა მეურნეობის სამინისტროს საპროექტო ინსტიტუტ "საქწყალპროექტში ჯგუფის ხელმძღვანელად, სამშენებლო ტრესტ "სამგორწყალმშენში" უბნის უფროსად, სამშენებლო ტრესტ "კოლხეთმშენის" აფხაზეთის სამშენებლო-სამონტაჟო სამმართველოს მთავარ ინჟინრად, უფროსად; იყო სამშენებლო ტრესტ "კოლხეთმშენის" მმართველი, რესპუბლიკური საწარმოო გაერთიანება "საქწყალექსპლუატაციის" უფროსის მოადგილე და "საქსოფწყალმომარაგების" თავმჯდომარე; იყო სამხრეთ ოსეთის ავტონომიური ოლქის საოლქო საბჭოს აღმასკომის თავმჯდომარის მოადგილე; ხელმძღვანელობდა ქვემო სამგორისა და ზემო ალაზნის სარწყავი სისტემების, ზონკარის ირიგაციული დანიშნულების წყალსაცავის, კოლხეთის დაბლობის დამშრობი ნაგებობების, სამრეწველო-სამოქალაქო, ჯანმრთელობის დაცვისა და სოციალური ინფრასტრუქტურის ობიექტების მშენებლობას; დიდი წვლილი აქვს შეტანილი ქ. ფოთის მშენებლობისა და განვითარების საქმეში; არაერთგზის იყო არჩეული ცხინვალისა და ფოთის საქალაქო საბჭოების დეპუტატად.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.262-263

• საპატიო ნიშნის მედალი
• საპატიო ნიშნის ორდენი
• საქართველოს დამსახურებული ინჟინერი