აკაკი ირომაშვილი

დაბადების ადგილი: სოფელი მელაანი, გურჯაანის რაიონი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი საშენ მასალათა ტექნოლოგიის სპეციალობით 1975 წელს; სამეცნიერო-კვლევითი ინსტიტუტ "საქსაშენმასალების" ასპირანტურა სილიკატური და ძნელად დნობადი მასალების განხრით 1990 წელს.

1975-1995წწ. მუშაობდა საქართველოს სასოფლო მშენებლობის სამინისტროს N4 სამშენებლო ტრესტში ინჟინერ-ტექნოლოგად; სამშენებლო მასალების ეფექტიანი გამოყენების, ხარისხის ამაღლებისა და მდგრადობის დარგში გამოქვეყნებული აქვს რამდენიმე სამეცნიერო გამოკვლევა, რომლებიც ეხება კონდუქტომეტრული მეთოდით ცემენტის აქტივობის განსაზღვრასა და ბეტონის მოსალოდნელი სიმტკიცის განსაზღვრის ელექტრონულ მეთოდს; აქვს ორი საავტორო მოწმობა, რის საფუძველზეც დამუშავდა მეთოდური მითითებები და შეიქმნა ხელსაწყო, რომელიც როგორც ლაბორატორიულ, ისე საველე პირობებში იძლევა, 15-20 წუთში, ცემენტის აქტივობის განსაზღვრის შესაძლებლობას; არის არაერთი გამოგონებისა და რაციონალური წინადადების ავტორი; მისი მეთოდი დანერგილია საქართველოს სამეცნიერო და საწარმოო ორგანიზაციებში და დიდი როლი შეასრულა სამშენებლო მასალების მაღალი ხარისხის უზრუნველყოფის საქმეში; მისი არაერთი გამოგონება აღინიშნა სახელმწიფო პრემიებითა და ჯილდოებით.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.266