სიმონა დოლიძე

დაბადების ადგილი: სოფელი ამაღლება, ოზურგეთის რაიონი.

დაიბადა ღარიბი გლეხის ოჯახში. მისი მამა ბათუმის ნავსადგურში მტვირთავების ასისთავად მუშაობდა. სოფლის ორკლასიანი სასწავლებლის დასრულების შემდეგ ბათუმში გაემგზავრა და მამის მოულოდნელი გარდაცვალების შემდეგ მის ადგილზე დაიწყო მუშაობა. ბათუმში გაეცნო მარქსისტულ ლიტერატურას და ჩაება რევოლუციურ მოძრაობაში; რევოლუციის დამარცხების შემდეგ დოლიძე ფირალად გავარდა და ტყეში გახიზნულ წითელრაზმელებს შეუერთდა. რევოლუციური კომიტეტის დავალებით მრავალი ტერორისტული აქტი და დავალება შეასრულა. მონაწილეობდა ლიანდაგების აყრაში, ძარცვავდა ბანკებს, ფოსტებსა და მატარებლებს. თანამედროვენი მას ახასიათებდნენ, როგორც უაღესად გულკეთილ, თავმდაბალ ადამიანს, თუმცა უსამართლობას რომ ნახავდა, პასუხის გაუცემლად არ დატოვებდა. სიმონა დოლიძის შესახებ არსებობს ხალხური ლექსი და სიმღერა.