ავთანდილ კანდელაკი

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის ჰიდროტექნიკის ფაკულტეტი ჰიდროტექნიკურ ნაგებობათა მშენებლობის სპეციალობით 1956 წელს.

1957 წლიდან მუშაობდა საქართველოს მშენებლობის სამინისტროს სამშენებლო გაერთიანება "მთავართბილმშენში" სხვადასხვა თანამდებობაზე, მათ შორის, N1 რკინაბეტონის ქარხნის დირექტორად; 1973-1986წწ. ხელმძღვანელობდა თბილისის საქალაქო საბჭოს აღმასკომის საბინაო სამმართველოსა და კიროვის (ამჟამად, კრწანისის რაიონის გამგეობა) რაისაბჭოს აღმასკომს; 1986-1996წწ. მუშაობდა ტრესტ "საქმშენინდუსტრიაში" მთავარ ინჟინრად, გენერალურ დირექტორად; 1996 წელს დაინიშნა საქართველოს ნავთობის საერთაშორისო კორპორაციაში პროექტირებისა და მშენებლობის კოორდინატორად; 1997 წლიდან სათავეში ედგა საქართველოს ნავთობის საერთაშორისო კორპორაციის მშენებლობის მონიტორინგის სამსახურს; ხელმძღვანელობდა თურქეთის ქალაქ იზმირში სამშენებლო პავილიონის, თბილისის სპორტის სასახლის, ბორის პაიჭაძის სახელობის თბილისის სტადიონის, სასტუმრო "ივერიის" სამშენებლო ნაკეთობებითა და კონსტრუქციებით უზრუნველყოფას; მონაწილეობდა "ბაქო-თბილისი-სუფსის", "ბაქო-თბილისი-ჯეიჰანის" ნავთობსადენისა და "ბაქო-თბილისი-ერზრუმის" გაზსადენის პროექტირება-მშენებლობაში; არის საქართველოს ეკონომიკურ და სოციალურ ურთიერთობათა აკადემიის აკადემიკოსი, საქართველოს მშენებელთა ფედერაციის ერთ-ერთი დამფუძნებელი; დაჯილდოებულია სხვადასხვა სახელმწიფო ჯილდოებით, მიღებული აქვს "2002 წლის ინჟინრის" საპატიო წოდება.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.277; წიგნი ღირსებისა: ტ. 4/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2002. - გვ.110

• 1999 - ღირსების ორდენი
  დასავლეთის მიმართულების ნავთობსადენის და სუფსის სახმელეთო ტერმინალის პროექტის საერთაშორისო სტანდარტების უმაღლეს დონეზე განხორციელებისათვის, მშენებლობის დროს გამოჩენილი მაღალი პროფესიონალიზმისათვის,თავდადებული და ნაყოფიერი შრომისათვის
• საქართველოს დამსახურებული მშენებელი