როინ კვანტალიანი

დაბადების ადგილი: სოფელი სამიქაო, აბაშის რაიონი.

დაამთავრა სოხუმის ინდუსტრიული ტექნიკუმი 1956 წელს; ოდესის საინჟინრო-სამშენებლო ინსტიტუტის სამრეწველო და სამოქალაქო მშენებლობის ფაკულტეტი 1961 წელს.

შრომითი საქმიანობა დაიწყო 1961 წელს ყაზახეთის სსრ, ყამირის მხარის, ჩრდილოეთ ყაზახეთის ოლქის, სოფლის მეურნეობის საოლქო სამმართველოს, სამშენებლო უბნის უფროსად; 1963 წელს დაბრუნდა ქ. სოხუმში და მუშაობა დაიწყო საქართველოს მშენებლობის სამინისტროს N6 სამშენებლო ტრესტის N5 სამშენებლო სამმართველოში სამუშაოთა მწარმოებლად; 1964-1974წწ. მუშაობდა სოხუმის ინდუსტრიულ ტექნიკუმში, სადაც განვლო სამსახურებრივი წინსვლის გზა განყოფილების გამგიდან ტექნიკუმის დირექტორობამდე; 1977 წელს აირჩიეს სოხუმის რაიონული საბჭოს აღმასკომის თავმჯდომარედ; 1985 წელს საქართველოს კომპარტიის აფხაზეთის საოლქო კომიტეტის გულრიფშის რაიონული კომიტეტის პირველ მდივნად; 1989 წელს სამუშაოდ გადაიყვანეს აფხაზეთის ავტონომიური რესპუბლიკის ადგილობრივი მრეწველობის მინისტრის მოადგილედ; დიდი წვლილი აქვს შეტანილი აფხაზეთის ავტონომიური რესპუბლიკის სოხუმისა და გულრიფშის რაიონების კომპლექსური განაშენიანების საქმეში; ხელმძღვანელობდა ზემოაღნიშნული რაიონების სოციალურ-კულტურული და სასოფლო-სამეურნეო დანიშნულების ობიექტების მშენებლობის საკითხებს ადგილობრივი თვითმმართველობის კომპეტენციის ფარგლებში; მიღებული აქვს სხვადასხვა სახელმწიფო ჯილდო.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.290