გივი კვიჭიძე

დაბადების ადგილი: სოფელი აცანა, ლანჩხუთის რაიონი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი სამრეწველო და სამოქალაქო მშენებლობის სპეციალობით 1951 წელს.

შრომითი საქმიანობა დაიწყო სამშენებლო ტრესტ "თბილმშენის" N5 სამშენებლო სამმართველოში გეოდეზისტად; მუშაობდა სამუშაოთა მწარმოებლად ვერეს ხიდის სამშენებლო უბანზე; 1957 წლიდან იყო საქართველოს მშენებლობის სამინისტროს სამშენებლო ტრესტ "თბილმშენის" N6 სამშენებლო სამმართველოს სამუშაოთა მწარმოებელი; 1959 წელს დაწინაურებულ იქნა მსხვილპანელიანი სახლების სამშენებლო სამმართველოს უფროსად; 1971-1982წწ. საქართველოს მშენებლობის სამინისტროს სამშენებლო გაერთიანება "მთავართბილმშენის" N14 სამშენებლო ტრესტის ხელმძღვანელი იყო; 1982 წლიდან სამშენებლო გაერთიანება "მთავართბილმშენის" უფროსი; იყო საქართველოს მშენებლობის მინისტრის მოადგილე და კოლეგიის წევრი; არაერთხელ იყო არჩეული თბილისის საქალაქო საბჭოს დეპუტატად და აღმასკომის წევრად; 1987 წელს დაინიშნა სამშენებლო-სარემონტო ტრესტ "თბილრემმშენის" უფროსად; 1995 წლიდან შეზღუდული პასუხისმგებელი საზოგადოება "თბილმშენის" თავმჯდომარე იყო; მისი ხელმძღვანელობით ქ. თბილისში აშენდა მრავალი მნიშვნელოვანი საინჟინრო შენობა-ნაგებობა, მაღალსართულიანი, კარკასულ-პანელიანი და მსხვილბლოკიანი საცხოვრებელი სახლები; ასევე, სკოლები და საბავშვო ბაღები, სასტუმრო "ივერია", ფილარმონიის დიდი საკონცერტო დარბაზი, საქტელერადიო ცენტრი, ალპინისტური კლუბი და ჭადრაკის სასახლე ვერეს პარკში, შესანიშნავი ხიდები მდინარე მტკვარზე, მადნეულის სამთო-გამამდიდრებელი კომბინატის დასახლება კაზრეთში, საცხოვრებელი კორპუსები ტიუმენში, ტაშკენტში, გროზნოში, ვასო აბაშიძის სახელობის მუსიკალური თეატრი და მრავალი სხვა; საქართველოს ბიზნეს მეცნიერებათა აკადემიის აკადემიკოსი; საინჟინრო-ეკონომიკური ინსტიტუტის საპატიო პროფესორი; მიღებული ჰქონდა საქართველოს უმაღლესი საბჭოს პრეზიდიუმის, საქართველოს განათლებისა და უმაღლესი სასწავლებლების სამინისტროს და საქართველოს პროფესიულ-ტექნიკური განათლების სახელმწიფო კომიტეტის საპატიო სიგელები; ოქტომბრის რევოლუციის ორდენი, ვახტანგ გორგასლის ორდენი.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.297; წიგნი ღირსებისა: ტ. 3/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2001. - გვ.189

• საქართველოს ბიზნეს მეცნიერებათა აკადემია, აკადემიკოსი

• 1998 - ღირსების ორდენი
  მშენებლობის დარგის განვითარებაში შეტანილი დიდი წვლილის, ნაყოფიერი სამეურნეო საქმიანობისა და აქტიური საზოგადოებრივი მოღვაწეობისათვის
• ინგუშეთის დამსახურებული ინჟინერი
• ჩეჩნეთის დამსახურებული ინჟინერი
• საქართველოს დამსახურებული ინჟინერი