ემილ სირბილაძე

დაბადების ადგილი: ქ. თელავი.

დაამთავრა თელავის ოთხკლასიანი სასწავლებელი, ტფილისის სასულიერო სემინარია.

1893 წელს მონაწილეობა მიიღო სემინარისტების "ბუნტში", რის გამოც სემინარია 1 წლით დახურეს და სემინარისტები სხვადასხვაგვარად დასაჯეს. 1900 სასწავლო წლიდან დანიშნეს მასწავლებლად დუშეთის მაზრის სოფელს სნოს სკოლაში. 1917 წელს აირჩიეს მუშათა და ჯარისკაცთა დეპუტატების საბჭოს პრეზიდიუმის წევრად; მუშაობდა არმიაში კულტურის მიმართულებით, აარსებდა ბიბლიოთეკებსა და მართავდა წარმოდგენებს. 1919 წლიდან იყო საქართველოს სახალხო გვარდიის მთავარი შტაბის წევრი. 1919 წლის 9 მაისიდან, იყო საქართველოს დემოკრატიული რესპუბლიკის დამფუძნებელი კრების წევრი, საქართველოს სოციალ-დემოკრატიული მუშათა პარტიის სიით; იყო აგრარული კომისიის თავმჯდომარის ამხანაგი. 1919 წლიდან იყო თბილისის ქალაქის საბჭოს ხმოსანი. 1922-1923წწ. მუშაობდა საქართველოს ცენტრალურ კოოპერატიულ კავშირში ("ცეკავშირი") ინსტრუქტორად. 1937 წლის 26 დეკემბერს საქართველოს სსრ შინსახკომთან არსებულმა განსაკუთრებულმა სამეულმა (ე. წ. "ტროიკა") დახვრეტა მიუსაჯა. დახვრიტეს იმავე ღამეს. 

წყარო: საქართველოს დამფუძნებელი კრება 1919. -თბ., 2016.-გვ.361

• თბილისის ქალაქის საბჭო, ხმოსანი (1919-)
• საქართველოს რესპუბლიკის დამფუძნებელი კრება, წევრი (1919-)