მამია კიკნაძე

დაბადების ადგილი: სოფელი დიმი, ბაღდათის რაიონი.

დაამთავრა ყაზანის კომუნალურ-სამშენებლო ინსტიტუტის სამშენებლო ფაკულტეტი სამრეწველო და სამოქალაქო მშენებლობის სპეციალობით 1941 წელს, ხოლო 1943 წელს ლენინგრადის სამხედრო-საინჟინრო აკადემია.

1943-1947წწ. მსახურობდა საბჭოთა არმიის რიგებში II მსოფლიო ომის ფრონტებზე ინჟინერ-კაპიტნის წოდებით; შრომითი საქმიანობა დაიწყო ჯერ კიდევ სტუდენტმა; 1940 წელს ვორონეჟის ოლქში დამოუკიდებლად ააშენა სკოლა 210 მოსწავლეზე; 1947-1981წწ. დემობილიზაციის შემდეგ მუშაობდა საქართველოს მშენებლობის სამინისტროს სისტემაში უფროს სამუშაოთა მწარმოებლად, სამმართველოს უფროსად, ტრესტის მმართველის მოადგილედ, N13 ტრესტის მმართველად, მინისტრის მოადგილედ; 1981-1986წწ. იყო საქართველოს კვების მრეწველობის მინისტრის მოადგილე მშენებლობის დარგში; რეგიონული გაერთიანება "საქაგრომრეწვში" კაპიტალური მშენებლობის მთავარი სამმართველოს უფროსის მოადგილე; დიდი დამსახურება მიუძღვის ახალი ტექნოლოგიების, ტექნიკის მიღწევების, ახალი კონსტრუქციებისა და სამშენებლო მასალების წარმოებაში დანერგვის საქმეში; მან პირველად გამოიყენა საქართველოში სამშენებლო პრაქტიკაში ე.წ. "საბურღ-სატენი" ხიმინჯები (იზოტოპების ქარხნის მშენებლობაში); უშუალოდ მშენებლობასთან მოწყობილ პოლიგონებზე დამზადებული რკინაბეტონის ანაკრები კონსტრუქციები მრავალსართულიანი სამრეწველო ნაგებობებისთვის; თბილისის ზონალურ ს/კ და საპროექტო ინსტიტუტ "თბილზნიიეპთან" ერთად წარმატებით დანერგა უნიფიცირებული კარკასული ანაკრები რკინაბეტონის სეისმომედეგი ნაკეთობები მაღლივი შენობებისათვის (სერია "იის-04") საქართველოს მასშტაბით; სამამულო ომის წლებში ჩართული იყო სამხედრო-ოპერატიული აეროდრომების მშენებლობაში; დაჯილდოებულია საქართველოს უმაღლესი საბჭოს პრეზიდიუმის საპატიო სიგელით.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.306-307;  წიგნი ღირსებისა: ტ. 3/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2001. - გვ.229

• 1998 - ღირსების ორდენი
  საქართველოში მშენებლობისა და სამშენებლო ინდუსტრიის განვითარებაში შეტანილი პირადი დიდი წვლილისა და ნაყოფიერი საზოგადოებრივი საქმიანობისათვის
• სამამულო ომის II ხარისხის ორდენი
• შრომის წითელი დროშის ორდენი
• წითელი ვარსკვლავის ორდენი
• საქართველოს დამსახურებული ინჟინერი
• საქართველოს სახელმწიფო პრემია, ლაურეატი