კარლო ორაგველიძე

დაბადების ადგილი: სოფელი შუხუთი, ლანჩხუთის რაიონი.

სწავლობდა სოფლის სკოლაში, შემდეგ - გიმნაზიაში. უმაღლესი განათლება მიიღო მოსკოვში, სვერდლოვსკის სახელობის უნივერსიტეტში.

უნივერსიტეტის დამთავრების შემდეგ მას მიენიჭა წითელი პროფესორის სამეცნიერო წოდება. საბჭოთა ხელისუფლების დამყარების შემდეგ იგი საქართველოს კპ(ბ) ცენტრალური კომიტეტის კულტურისა და პროპაგანდის განყოფილებას განაგებდა; 1935-1937წწ. თბილისის სახელმწიფო უნივერსიტეტის რექტორად იყო დანიშნული. რექტორის თანამდებობაზე ყოფნის დროს თავი იმით "გამოიჩინა", რომ 1936 წლის 23 მარტს თბილისის სახელმწიფო უნივერსიტეტის ისტორიის ფაკულტეტის სამეცნიერო საბჭოს სხდომაზე წაიკითხა მოხსენება "საქართველოს ისტორიის საკითხისათვის", რომლის უმთავრესი მიზანი უნივერსიტეტის დამაარსებლის ივანე ჯავახიშვილის, როგორც ისტორიკოსის განქიქება და განადგურება იყო. მან ივანე ჯავახიშვილის დამსახურება ქართული ისტორიოგრაფიის წინაშე მარტოოდენ ემპირიული მასალების, ფაქტების შეგროვებასა და მათ ერთგვარ სისტემატიზაციამდე დაიყვანა. იმავე წელს მან თავისი მოხსენება თბილისის სახელმწიფო უნივერსიტეტის "შრომებშიც" დაბეჭდა (1936, V, პირველი სერია: საზოგადოებათმეცნიერებანი). კ. ორაგველიძეს ეკუთვნის ნაშრომები მარქსისტულ-ლენინური თეორიისა და პარტიის ისტორიის სხვადასხვა საკითხზე. დახვრიტეს 1937 წელს. 

წყარო: თბილისის სახელმწიფო უნივერსიტეტის ვებ-გვერდი: www.tsu.ge

• საქართველოს ისტორიის საკითხებისათვის (ავტორი). - ტფილისი, სახ. უნ-ტის გამ-ბა და სტ., 1936. - 65გვ.
• პარტიული სწავლების მაღალი ხარისხისათვის (ავტორი). - ტფილისი, ჟურნ. საქ. სოც. მეურნე-ბას გა-მა, 1933. - 69გვ.
• ბურჟუაზიული ეკონომისტები საბჭოთა ეკონომიკის შესახებ (ავტორი). - ტფილისი, ჟურ. საქართველოს სოციალისტური მეურნეობას გა-მა, 1931. - 209გვ.