დავით ლაშქარაძე

დაამთავრა საქართველოს პოლიტექნიკური ინსტიტუტის სამშენებლო ფაკულტეტი ინჟინერ-კონსტრუქტორის კვალიფიკაციით 1954 წელს.

შრომითი საქმიანობა დაიწყო საპროექტო ინსტიტუტ "საქგიპროშახტში"; 1956-1958წწ. მუშაობდა დონეცკში, 1958-1961წწ. საქართველოში დაბრუნების შემდეგ კვლავ მუშაობდა საპროექტო ინსტიტუტ "საქგიპროშახტში" მშენებელ კონსტრუქტორად; 1961-1968წწ. საქართველოს ჯანმრთელობის დაცვის სამინისტროს სამშენებლო-სარემონტო სამმართველოში ინჟინრად; 1968 წელს დაინიშნა საქართველოს ტურიზმის საბჭოს სამშენებლო-სარემონტო სამმართველოს მთავარ ინჟინრად; 1971 წლიდან საქართველოს მეცნიერებათა აკადემიის სისტემაში იყო სხვადასხვა ხელმძღვანელ თანამდებობებზე; ხელმძღვანელობდა თბილისში, ბორჯომში, ბაკურიანში, შოვში, ჩაქვში, ციხისძირში, თელავში, მცხეთაში, ფოთში, ტურისტული ბაზების, თბილისისა და ქუთაისის საბაგირო გზების, ფხვნილოვანი მეტალურგიის სამეცნიერო ინსტიტუტისა და სპეციალიზებული საკონსტრუქტორო ბიუროს შენობის (თბილისში), სვანეთის ისტორიულ-ეთნოგრაფიული მუზეუმის (დაბა მესტიაში) პროექტირებას და მშენებლობას; არის სსრკ სახალხო მეურნეობის მიღწევათა გამოფენის ლაურეატი და ვერცხლის მედალოსანი.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.338-339

• შრომის ვეტერანის მედალი
• მედალი "შრომითი წარჩინებისთვის"
• საქართველოს დამსახურებული ინჟინერი