მერაბ მამალაძე

დაბადების ადგილი: ქ. ფოთი. 

დაამთავრა საქართველოს პოლიტექნიკური ინსტიტუტის სამშენებლო ფაკულტეტი 1962 წელს, ოდესის საზღვაო ფლოტის ინჟინერთა ინსტიტუტის ჰიდროტექნიკური ფაკულტეტი საწყალოსნო მიმოსვლისა და ნავსადგურების მშენებლობის სპეციალობით 1967 წელს.

1970-1984წწ. იყო ფოთის ნავსადგურის მთავარი ინჟინერი; მისი მონაწილეობითა და ხელმძღვანელობით შეიქმნა 2,5 ჰა ფართობის ფოთის პორტის ახალი დაღრმავებული აკვატორია, აშენდა ახალი N6 და N8 გემმისადგომები, რეკონსტრუქცია გაუკეთდა N1 და N2 გემმისადგომებს; ავტორია მთელი რიგი ტექნიკურ სიახლეებისა და წინადადებების, რისთვისაც მინიჭებული ჰქონდა საზღვაო ფლოტის საუკეთესო ინჟინერ-რაქციონალიზატორის წოდება; სრულიად ახალგაზრდა სპეციალისტმა შეასრულა ზღვის სანაპირო ზოლის პლაჟ-წარმომქმნელი რეფულირება, ნავსადგურის აკვატორიიდან ამოღებული პულპის გამოყენებით, რაც მოგვიანებით ფართომასშტაბიანი პროგრამით განახორციელა საწარმოო გაერთიანება "საქნაპირდაცვამ", ქ. ფოთის კუნძულის ზონის სანაპირო ზოლზე; როგორც მაღალკვალიფიციური სპეციალისტი, არაერთგზის იყო მივლინებული საზღვარგარეთ გამოცდილების გაზიარების მიზნით; 1984 წლის შემდეგ გადაყვანილ იქნა ქ. ფოთის ტერიტორიულ-დარგთაშორისი გაერთიანების უფროსად; იყო საქართველოს მინისტრთა საბჭოსთან არსებული კაპიტალური მშენებლობის მთავარი სამმართველოს ქ. ფოთის სამმართველოს უფროსი, ქ. ფოთის მერიის მრჩეველი, სადაც მუშაობდა 1993 წლამდე; 1993 წელს უბრუნდება ფოთის ნავსადგურს, სადაც მუშაობდა მთავარ სპეციალისტად; დაჯილდოებული იყო შავი ზღვის ფლოტის გენშტაბის საპატიო სიგელით.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.365; წიგნი ღირსებისა: ტ. 4/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2002. - გვ.293

• 1999 - ღირსების ორდენი
  სამშენებლო სფეროში მიღწეული წარმატებისთვის, მსხვილი ობიექტების მშენებლობაში შეტანილი პირადი დიდი წვლილისა და შენობა-ნაგებობების აღდგენა-რესტავრაციის დროს გამოჩენილი მაღალი პროფესიონალიზმისათვის