ვახტანგ მარღანია

დაბადების ადგილი: ქ. სოხუმი.

დაამთავრა სოხუმის ინდუსტრიული ტექნიკუმი 1964 წელს; საქართველოს პოლიტექნიკური ინსტიტუტი სამრეწველო და სამოქალაქო მშენებლობის სპეციალობით 1980 წელს.

1964-1984წწ. მუშაობდა სამშენებლო ტრესტ "თბილგვირაბმშენის" სისტემაში ტექნიკოსად, საწარმოო-ტექნიკური განყოფილების ინჟინრად, უბნისა და საწარმოო განყოფილების უფროსად, მთავარ ინჟინრად; 1985 წლიდან აფხაზეთის მშენებლობის სახელმწიფო კომიტეტში (შემდგომში - მშენებლობის საქმეთა სამინისტრო) - მთავარ სპეციალისტად, სახელმწიფო არქიტექტურულ-სამშენებლო ინსპექციის უფროსად; ხელმძღვანელობდა პიონერთა ბანაკისა და საცხოვრებელი სახლის (სოფელ აგუძერაში), კომკავშირის XV ყრილობის სახელობის ტურისტული ბაზის სოლარიუმის კომპლექსის, საბავშვო კაფეს კომპლექს "აწანგუარას" (კინოთეატრ "სოხუმის" პარკში), მიწისქვეშა გადასასვლელების (ქ. სოხუმში), სინოპის დენდროპარკის შესასვლელი ნაგებობის მშენებლობას; მონაწილეობდა ახალი ათონის მღვიმის კომპლექსის მშენებლობაში.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.372