ავთანდილ მახარობლიშვილი

დაამთავრა საქართველოს პოლიტექნიკური ინსტიტუტის სამშენებლო ფაკულტეტი ინჟინერ-კონსტრუქტორის კვალიფიკაციით 1952 წელს.

1952-1953წწ. მუშაობდა საქართველოს ჯანმრთელობის დაცვის სამინისტროს სახელმწიფო საპროექტო ინსტიტუტში ინჟინერ-კონსტრუქტორად; 1953-1965წწ. საქართველოს სახელმწიფო საპროექტო ინსტიტუტ "საქქალაქმშენსახპროექტის" არქიტექტურული სახელოსნოს მთავარი კონსტრუქტორი იყო; 1965-1969წწ. მუშაობს საქართველოს მშენებლობის სამინისტროს N2 სამშენებლო ტრესტის N10 სამშენებლო სამმართველოს მთავარ ინჟინრად; 1969-1974წწ. იყო სახელმწიფო საპროექტო ინსტიტუტ "გიპროკინოს" თბილისის ფილიალის დირექტორი; 1974-1979წწ. იყო საქართველოს პროფკავშირების კურორტების მართვის რესპუბლიკური საბჭოს კაპიტალური მშენებლობის სამმართველოს უფროსი; 1979-1991წწ. მუშაობდა საქართველოს საპროექტო ინსტიტუტ "საქკურორტპროექტის" მთავარ ინჟინრად; მისი ხელმძღვანელობითა და მონაწილეობით დაპროექტებული და აშენებულია რამდენიმე ათეული საცხოვრებელი და საზოგადოებრივი დანიშნულების შენობები; მის მიერ პირველად დამუშავდა საქართველოში საცხოვრებელი სახლების ბლოკსექციები მზიდი ანაკრები კედლის პანელებით; დანერგილი აქვს სეისმომედეგი ანაკრები კონსტრუქციები სეისმური რაიონებისათვის; ინჟინერ-კონსტრუქტორ დ. ქაჯაიასთან ერთად მონაწილეობდა ქ. თბილისის სპორტის სასახლის მზიდი კონსტრუქციების დამუშავებაში; მისი ხელმძღვანელობით აშენდა თბილისის სახელმწიფო უნივერსიტეტის ახალი მაღლივი სასწავლო კორპუსი საბურთალოს რაიონში; არისდიდი სამამულო ომის მონაწილე (1942-1946); მიღებული აქვს საბრძოლო და სამოქალაქო სახელმწიფო ჯილდოები.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.384