ზოია რუხაძე

ქართველი პარტიზანი ქალი. მეორე მსოფლიო ომის მონაწილე. გერმანელი ოკუპანტების წინააღმდეგ სიმფეროპოლში მოქმედი კომკავშირული ორგანიზაციის აქტიური წევრი. გერმანელთა ყაზარმებზე აკრავდა სსრკ საინფორმაციო ბიუროს ცნობებს და ანტიფაშისტურ ფურცლებს, აგროვებდა სადაზვერვო ხასიათის ცნობებს მტრის დისლოკაციასა და მოძრაობებზე. 1944 წლის 10 მარტს გესტაპოს აგენტებმა დააპატიმრეს და ერთი თვის საშინელი წამების შემდეგ ჭაში ჩაახრჩვეს. ზოია რუხაძის ძეგლი დგას სიმფეროპოლსა და თბილისში, მისი სახელი ეწოდა სიმფეროპოლის მე-14 და თბილისის 42-ე საშუალო სკოლებს, ქუჩებს სიმფეროპოლსა და თბილისში, კომკავშირულ და პიონერულ ორგანიზაციებს. მის გმირობაზე შეიქმნა კინოსურათი "ზოია რუხაძე" (რეჟისორი დავით რონდელი), დაიწერა პოემა (იოსებ ნონეშვილი).

წყარო: ქართული საბჭოთა ენციკლოპედია: ტ.8.-თბ., 1984.-გვ.519; mastsavlebeli.ge