ივანე ნებიერიძე

დაბადების ადგილი: ქ. ზესტაფონი.

დაამთავრა თბილისის რკინიგზის ტრანსპორტის ინჟინერთა ინსტიტუტის სამშენებლო ფაკულტეტი 1948 წელს.

ინსტიტუტის დამთავრების შემდეგ გაანაწილეს ქ. ვოლგოგრადში (ყოფილი სტალინგრადი) მეორე მსოფლიო ომის დროს დანგრეული ქალაქის აღდგენაში მონაწილეობის მისაღებად; მუშაობდა სამუშაოთა მწარმოებლად საცხოვრებელი სახლების მშენებლობაზე; 1950 წელს სათავეში ჩაუდგა სტალინგრადის სარკინიგზო სადგურის მშენებლობას, რომელიც საზოგადოებრივი დანიშნულების ნაგებობათა კონკურსზე პირველი ადგილით აღინიშნა; 1955 წელს, საქართველოს მშენებლობის სამინისტროს რუსთავის სამშენებლო ტრესტ "ამიერკავკასმეტალურგმშენის" მოთხოვნით დაბრუნდა საქართველოში; ხელმძღვანელობდა ზესტაფონის ფეროშენადნობთა ქარხნის N1, N2, და N3 (ელექტროლიზური) საამქროების კომპლექსების, საკირე მეურნეობის და ათობით საცხოვრებელი სახლის მშენებლობას; 1957 წლიდან მუშაობდა ჭიათურაში საქართველოს მშენებლობის სამინისტროს N8 სამშენებლო ტრესტის სისტემაში სამშენებლო სამმართველოების: "მრეწვმშენის", "ბინათმშენებლობისა" და "ჭიათურმშენის" უფროსად, ტრესტის მთავარ ინჟინრად; 1970-1974წწ. N8 სამშენებლო ტრესტ "ჭიათურმანგანუმმშენის" მმართველი იყო; 1974-2008წწ. იყო სამშენებლო ტრესტ "საქჰიდროენერგომშენის" მმართველის მოადგილე და სს "საქჰიდროენერგომშენის" გენერალური დირექტორის მოადგილე; სხვადასხვა დროს ხელმძღვანელობდა რესპუბლიკის განსაკუთრებით მნიშვნელოვანი სამრეწველო ობიექტების მშენებლობას; ესენია: გამამდიდრებელი კომბინატი და ახალი მაღარო (დარკვეთში), N29 გამამდიდრებელი ფაბრიკა (საყოფაცხოვრებო კორპუსებითა და საბაგირო გზით), ცენტრალური საფლოტაციო და დამყვანი ფაბრიკების კომპლექსები, ცენტრალური მექანიკური სახელოსნო, ფასკნარის სასმელი წყლის მაგისტრალური ხაზი და სხვა; მონაწილეობდა "ენგურჰესის", "ჟინვალჰესის", თბილისის სასმელი წყლით მომარაგების ჰიდროკვანძის, გარდაბნის საკანალიზაციო კოლექტორის, ვარციხის კასკადის 4 ჰესისა და სხვა ობიექტების მშენებლობაში; მიღებული აქვს სახელმწიფო ჯილდოები.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.456-457

• საქართველოს დამსახურებული ინჟინერი