ავთანდილ ურუშაძე

დაბადების ადგილი: ქ. ლანჩხუთი.

დაამთავრა ლანჩხუთის სამოქალაქო სასწავლებელი 1909 წელს.

1910 წელს გაიწვიეს სამხედრო სამსახურში. სამხედრო სკოლის დამთავრებისთანავე, 1914 წელს, მიიღო რუსეთის არმიის კავალერიის უნტერ-ოფიცრის ხარისხი და გაწვეულ იქნა პირველ მსოფლიო ომში. 1918 წლის დამდეგს ავთანდილ ურუშაძე დაბრუნდა სამშობლოში. იგი აქტიურად მონაწილეობდა სახალხო გვარდიის ჩამოყალიბებაში. აირჩიეს სახალხო გვარდიის მთავარი შტაბის წევრად და ლანჩხუთის სარაიონო შტაბის თავმჯდომარედ. ლანჩხუთის გვარდია მისი მეთაურობით აქტიურად მონაწილეობდა თითქმის ყველა მნიშვნელოვან სამხედრო ოპერაციაში. ავთანდილ ურუშაძე იყო სოციალ-დემოკრატიული გურიის სამხარეო ორგანიზაციის ერთ-ერთი ხელმძღვანელი. 1921-1924 წლებში იგი ეწეოდა აქტიურ პარტიზანულ საქმიანობას გურიაში. 1924 წლის აგვისტოს აჯანყებაში ხელმძღვანელობდა გურიის რაზმს და 5 დღის განმავლობაში წინააღმდეგობას უწევდა წითელ არმიას. აჯანყების დამარცხების შემდეგ მან დატოვა საქართველო. 1941 წლამდე საფრანგეთში ცხოვრობდა. მუშაობდა ოდენკურში - პეჟოს საავტომობილო ქარხანაში. აქტიურად მონაწილეობდა საფრანგეთის ქართული სათვისტომოს საქმიანობაში, იყო სათვისტომოს გამგეობის წევრი. იგი შედიოდა საქართველოს სოციალ-დემოკრატიული პარტიის საზღვარგარეთული ბიუროს შემადგენლობაში. 1941 წელს გადავიდა გერმანიაში, იყო "ქართული სამოკავშირეო კომიტეტის" განკარგულებაში. მსახურობდა ვერმახტის "ქართულ ლეგიონში". 1942 წლის დამლევს ლეგიონის სარდლობამ და ქართული სამოკავშირეო კომიტეტის ხელმძღვანელობამ მას მისცა საგანგებო დავალება, რაც ითვალისწინებდა ჯგუფთან ერთად თურქეთის მხრიდან საქართველოში შესვლას. ამ მიზნით ავთანდილ ურუშაძე ჩავიდა სტამბოლში. გეგმის ჩაშლის შემდეგ იგი თურქეთში დარჩა და ხელმძღვანელობდა თურქეთის ქართულ სათვისტომოს, აქტიურად იღვწოდა თურქეთის ქართველებში ეროვნული სულისკვეთების გაღვივებისათვის. პირველ მსოფლიო ომში გამოჩენილი სიმამაცისთვის დაჯილდოებული იყო წმინდა გიორგის ორი ჯვრითა და რამდენიმე მედლით. მისი ოჯახი, რომელიც საბჭოთა კავშირში დარჩა, შუა აზიაში გადაასახლეს.

• საქართველოს დამოუკიდებლობის კომიტეტი, წევრი
• საქართველოს სოციალ-დემოკრატიული პარტია, წევრი