გიორგი ფანცულაია

დაბადების ადგილი: ქ. ფოთი.

დაამთავრა თბილისის ქიმიის ტექნიკუმი 1931 წელს; საქართველოს ინდუსტრიული ინსტიტუტის სამთო ფაკულტეტი 1940 წელს.

1931-1933წწ. მუშაობდა ქ. კემეროვოში (რუსეთი) ქიმიური ქარხნის მშენებლობაზე; 1934-1937წწ. სამთო-მომპოვებელ ტრესტ "ჭიათურმანგანუმის" საპროექტო ბიუროში კონსტრუქტორად; 1937 წლიდან ბიუროს გამგედ; 1950-1958წწ. ტრესტის საპროექტო განყოფილების უფროსად; 1958-1960წწ. იყო იმავე ტრესტის კაპმშენებლობის განყოფილების მთავარი ინჟინერი; 1960-1961წწ. ტრესტის მთავარი ინჟინრის მოადგილე; 1961-1972წწ. ტრესტის მმართველის მოადგილე მშენებლობის დარგში; მოგვიანებით ტრესტის მთავარი ინჟინრის მოადგილე, ბაგირგზების მშენებლობის დარგში; 1979 წლიდან იყო საქართველოს მინისტრთა საბჭოსთან არსებული ბაგირგზების სამმართველოს ("საქბაგირგზები") მთავარი კონსტრუქტორი, აღიარებულია საქართველოში სამგზავრო ბაგირგზების მშენებლობის პიონერად; 1948 წელს მისი პროექტით ზესტაფონში აშენდა პირველი მსუბუქი ტიპის სამგზავრო ბაგირგზა; 1954 წელს ქ. ჭიათურაში მძიმე ტიპის თანამედროვე, ქანქარასებრი სამგზავრო ბაგირგზა; 1928-1980წწ. ქ. ჭიათურაში ადგილობრივი სპეციალისტების მიერ დაპროექტებული 118 კიდული ბაგირგზიდან უმეტესობა მისი დაპროექტებულია, ან საპროექტო სამუშაოები შესრულდა მისი ხელმძღვანელობით; მისი პროექტებით აშენდა ბაგირგზები თბილისში, ტყიბულში ახალციხეში, აბასთუმანში, გურჯაანში, ყაზბეგში, კურორტ კისლოვოდსკში, ლატვიის კურორტ სიგულდაში და სხვა; უდიდესი წვლილი აქვს შეტანილი ჭიათურის ბაგირგზების, კაბელამწეების, საბაგორი ხიდებისა და სხვა ობიექტების დაპროექტება-მშენებლობაში; იყო ბაგირგზების რომის I საერთაშორისო კონგრესის (1957), გერმანიის, ავსტრიის, შვეიცარიის, საფრანგეთის სიმპოზიუმების მონაწილე; მისი 26 საავტორო გამოგონება დანერგილია პრაქტიკაში.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.542-543

• საპატიო ნიშნის ორდენი
• შრომის წითელი დროშის ორდენი
• ოქტომბრის რევოლუციის ორდენი
• საქართველოს დამსახურებული გამომგონებელი