ჰასან-ფაშა ჯაყელი

ჰასან-ფაშა ჯაყელი, ახალციხის (ჩილდირის) ფაშა 1758-1759 და 1761-1769 წლებში. ახლად დანიშნულ ფაშას დაევალა განდგომილი იმერეთის სამეფოს კვლავ დამორჩილება. ამ მიზნით ჰასან-ფაშამ 1758 წელს ორჯერ ილაშქრა იმერეთში, მაგრამ ორჯერვე დამარცხდა. 1759 წელს გადააყენეს. მის ნაცვლად დანიშნეს იბრაჰიმ-ფაშა (ჯაყელი), რომელსაც ხალხი აუჯანყდა. 1761 წელს კვლავ ჰასან-ფაშა დანიშნეს ორი თუღით (გრძელ ტარზე წამოცმული ოქროს, ვერცხლის ან მოოქროვილი სპილენძის ბურთულა, რომელსაც ზემოდან დამაგრებული ჰქონდა ნახევარმთვარე, ხოლო ქვემოთ, ტარზე – ცხენის ძუის კონები; ოსმალეთში ანიჭებდნენ მაღალი თანამდებობის მოხელეებს ძალაუფლების ნიშნად). მალე იგი სამთუღიანი ფაშა და სერასკერი (ოსმალეთში - არმიის მთავარსარდალი) გახდა. 1763-1767 წლებში ჰასან-ფაშამ მრავალგზის ილაშქრა იმერეთში, მაგრამ უშედეგოდ. 1767 წლის თებერვალში იგი ახალციხიდან გაიწვიეს და სელენიქის ფაშად გაამწესეს.

წყარო: ვიკიპედია - თავისუფალი ენციკლოპედია: ka.wikipedia.org