გაიანე ბაგრატიონ-გრუზინსკაია

გაიანე ბატონიშვილი, გიორგი XII-ის და მისი პირველი მეუღლის ქეთევან ანდრონიკაშვილის ასული. ეპიტაფიის მიხედვით, გარდაიცვალა 1820 წლის 22 ივლისს 35 წლისა. მაშასადამე დაბადებულა 1785 წელს. ეს კი სწორი არ არის, რადგან მისი დედა -  პაპუა ანდრონიკაშვილის ასული ქეთევანი გარდაიცვალა 1782 წლის 2 ივნისს თეიმურაზზე მოლოგინების შემდეგ (თეიმურაზი კი დაიბადა 1782 წლის 23 აპრილს), ამიტომ უფრო სწორია ოფიციალური ცნობა 1801 წლის 1 აპრილისა, რომლის თანახმად გაიანე 20 წლისად არის ნაჩვენები, ამის მიხედვით ის დაბადებულა 1780 წელს. 1806 წლის სექტემბერში გენერალ–მაიორმა ნესვეტაევმა მიიღო გუდოვიჩის მიწერილობა – ბატონიშვილები რიფსიმე და გაიანე გაეგზავნა თელავიდან მოსკოვს. 1808 წლის თებერვალში ბატონიშვილები რიფსიმე და გაიანე მოსკოვში არიან, ითხოვენ პენსიის მომატებას და მოსკოვიდან პეტერბურგში დასახლებას. გაიანე ბატონიშვილი იღებდა 900 მანეთს პენსიას წელიწადში. მისთვის, როგორც გაუთხოვრისთვის ჩათვალეს, რომ ეს პენსია საკმარისია. 1808 წლის 15 ივნისს გაიანე ბატონიშვილს, რომელიც თხოვდებოდა პოლკოვნიკ გიორგი ერისთავზე სახელმწიფო საბჭომ დაუნიშნა მზითევი – 12000 მანეთი, იმ ოდენობისა, როგორიც ეძლეოდათ ფრეილინებს გათხოვებისას.  გაიანე ბატონიშვილი 1808 წელს გახდა მეუღლე გიორგი იესეს ძე ერისთავისა (სენატორისა) (1772–1863).  გაიანე გარდაიცვალა 1820 წლის 22 ივლისს, დასაფლავებულია იკორთის მონასტერში. დარჩა ვაჟი ზაქარია და ქალები - ქეთევან და მარიამი. ქეთევანი გათხოვდა მამუკა ორბელიანზე, მარიამი-გრიგოლ ერისთავზე. მისი ვაჟი, პოლკოვნიკი ზაქარია ერისთავი მოკლეს ლეკებმა 1850 წლის 4 აგვისტოს ზაქათალა-მუღანლოს გზაზე.

წყარო: საინფორმაციო პორტალი-საქართველოს თავად - აზნაურთა გენეალოგიური და ბიოგრაფიული მონაცემები: nobility.pro