ალექსანდრე ქირია

დაბადების ადგილი: სოფელი ცაიში, ზუგდიდის რაიონი.

დაამთავრა ლენინგრადის სამხედრო-პოლიტიკური სასწავლებელი 1951 წელს; საქართველოს პოლიტექნიკური ინსტიტუტის სამშენებლო ფაკულტეტი სამრეწველო და სამოქალაქო მშენებლობის სპეციალობით 1965 წელს; მოსკოვის უმაღლესი პოლიტიკური სასწავლებელი 1972 წელს; სახალხო მეურნეობის მართვის ინსტიტუტი 1983 წელს.

1946-1956წწ. მსახურობდა საბჭოთა არმიის რიგებში ოფიცრად; 1956-1970წწ. მოღვაწეობდა ქ. რუსთავში სხვადასხვა სამეურნეო და საზოგადოებრივ სარბიელზე, მათ შორის ამიერკავკასიის "მეტალურგმშენის" ტრესტში; აქტიურად მონაწილეობდა ქ. ტაშკენტში მიწისძვრისგან მიყენებული ზარალის სალიკვიდაციო სამუშაოების შესრულებაში, რისთვისაც დაჯილდოვებული იქნა უზბეკეთის სსრ უმაღლესი საბჭოს პრეზიდიუმის საპატიო სიგელით; 1970 წელს გადაყვანილ იქნა ქ. ზუგდიდში პარტიულ სამუშაოზე, საქალაქო კომიტეტის პირველ მდივნად, სადაც იმუშავა 1973 წლამდე; კურირებას უწევდა "ენგურჰესის" მშენებლობას; 1973-1987წწ. იყო საქართველოს ადგილობრივი მრეწველობის მინისტრის მოადგილე მშენებლობის დარგში; ამ პერიოდში ადგილობრივი მრეწველობის სისტემაში რეკონსტრუირებული და აშენებული იქნა 340-ზე მეტი სამრეწველო და საყოფაცხოვრებო დანიშნულების ობიექტი; 1987-1999წწ. მუშაობდა საქართველოს მშენებლობის სამინისტროს აპარატში სხვადასხვა თანამდებობაზე.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.569

• 2000 - ღირსების ორდენი
• შრომის წითელი დროშის ორდენი