ოთარ ყანჩაველი

დაბადების ადგილი: ქ. თბილისი.

დაამთავრა საქართველოს ინდუსტრიული ინსტიტუტის სამშენებლო ფაკულტეტი ჰიდროტექნიკურ ნაგებობათა მშენებლობის სპეციალობით 1945 წელს.

შრომითი საქმიანობა დაიწყო საქართველოს მეცნიერებათა აკადემიის ენერგეტიკისა და ჰიდროტექნიკურ ნაგებობათა ს/კ ინსტიტუტში მეცნიერ-თანამშრომლად; 1960 წელს თბილისის საქალაქო საბჭოს აღმასკომის მიერ მიწვეულ იქნა თბილისის წყალსადენის ტრესტში ინჟინრად, შემდეგ იყო მთავარი ინჟინერი; 1969 წლიდან ტრესტის მმართველი; 1972 წლიდან პრაქტიკული პროფესიული საქმიანობის პარალელურად ეწეოდა პედაგოგიურ მოღვაწეობას საქართველოს პოლიტექნიკურ ინსტიტუტში, კითხულობდა ლექციებს, იყო წყალმომარაგების და წყალარინების კათედრის დოცენტი, კათედრის გამგე; თბილისის წყალსადენში მუშაობის პერიოდში დიდი წვლილი აქვს შეტანილი ქალაქის წყალმომარაგების სისტემის განვითარებისა და მოწესრიგების საქმეში; განსაკუთრებით აღსანიშნავია არაგვის ხეობის სათავე ნაგებობებიდან მიღებული წყლის რაოდენობის მკვეთრი ზრდა, რაც მიღებულ იქნა მიწისქვეშა წყლების ნაკადის ხელოვნურად გაძლიერების ღონისძიებების გატარებით; 1953 წლიდან იყო ტექნიკურ მეცნიერებათა კანდიდატი; 1975 წლიდან საქართველოს პოლიტექნიკური ინსტიტუტის პროფესორი; გამოქვეყნებული ჰქონდა 40-ზე მეტი სამეცნიერო ნაშრომი, მათ შორის სახელმძღვანელოები და მეთოდური მითითებანი უმაღლესი სასწავლებლების სტუდენტებისათვის.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.590-591

• 1971 - საპატიო ნიშნის ორდენი
• საქართველოს დამსახურებული ინჟინერი