გუგული შათაშვილი

დაამთავრა საქართველოს ინდუსტრიული ინსტიტუტის სამშენებლო ფაკულტეტი, სანტექნიკისა და წყალარინების სპეციალობით 1936 წელს.

ინსტიტუტის დამთავრების შემდეგ მუშაობა დაიწყო  საპროექტო ინსტიტუტ "საქწყალპროექტის" სამშენებლო განყოფილების ინჟინრად, განყოფილების გამგედ; აღნიშნული სამუშაოდან აწინაურებენ საქართველოს სსრ წყალთა მეურნეობის სახალხო კომისარიატის საწარმოო-ტექნიკური განყოფილების გამგედ; 1946 წლიდან ტრესტ "საქჩაის" საბჭოთა მეურნეობის გაერთიანების მთავარი ინჟინერი იყო; 1949 წლიდან მუშაობდა ტრესტ "საქნახშირის" ტექნიკური განყოფილების უფროსად; 1952 წელს დაინიშნა აფხაზეთში ქ. ტყვარჩელის მაღაროთა მშენებლობის სამმართველოს უფროსად; 1955 წელს საქართველოს სახალხო მეურნეობის საბჭოს კაპიტალური მშენებლობის სამმართველოს უფროსის მოადგილე იყო, შემდგომ კი მთავარი ინჟინერი; იყო საქართველოს სსრ მსუბუქი მრეწველობის სამინისტროს საპროექტო ბიუროს მთავარი ინჟინერი, კაპიტალური მშენებლობის სამმართველოს უფროსი; შემდეგ პერიოდში მუშაობდა საქართველოს მშენებლობის სამინისტროს კაპიტალური მშენებლობის სამმართველოს განყოფილების უფროსად; მისი მონაწილეობითა და ხელმძღვანელობით დაპროექტებული და აშენებული იქნა სასოფლო-სამეურნეო დარგის, წყალთა მეურნეობის, ქვანახშირის და კვების მრეწველობის ათობით მნიშვნელოვანი ობიექტი, ტყვარჩელის ქვანახშირის გამამდიდრებელი ფაბრიკის (I და II რიგის ობიექტები) , "საქნახშირის" მშენებლობის კომბინატი, ჩაის გადამამუშავებელი ფაბრიკები, სამოქალაქო და სამრეწველო დანიშნულების ობიექტები ტყიბულსა და ჭიათურაში, საბინაო და კულტურულ-საყოფაცხოვრებო ობიექტები თბილისსა და ქუთაისში, წყალ-სამეურნეო ობიექტები და სხვა; თავისი ძირითადი პრაქტიკული პროფესიული მოღვაწეობის პარალელურად მიწვეული იყო და ლექციებს კითხულობდა საქართველოს პოლიტექნიკური ინსტიტუტის სამშენებლო ფაკულტეტზე სხვადასხვა ტექნიკურ დისციპლინებში; არჩეული იყო ამავე ინსტიტუტის სამშენებლო ფაკულტეტის სამეცნიერო საბჭოსა და სამთო ფაკულტეტის სადიპლომო კომისიის წევრად.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.603

• საქართველოს დამსახურებული ინჟინერი